ផលិតផលកសិកម្ម និងស្បៀងអាហាររបស់សហរដ្ឋអាមេរិក ទំនងជានឹងត្រូវដាក់បញ្ចូលទៅក្នុងបញ្ជីពន្ធសងសឹករបស់ប្រទេសចិនវិញ ប្រសិនបើរដ្ឋាភិបាលអាមេរិក សម្រេចដាក់ពន្ធ ១០% បន្ថែមទៀត ទៅលើទំនិញទាំងអស់របស់ចិននោះ។ នេះបើតាមការចុះផ្សាយពីសារព័ត៌មាន Reuters។
យោងតាមកាសែត Global Times បានដកស្រង់ប្រភពជិតស្និទ្ធដែលដឹងពីបញ្ហានេះ និងបាននិយាយកាលពីថ្ងៃទី៣ ខែមីនាថា ៖”អាជ្ញាធរចិនកំពុងសិក្សា និងរៀបចំគោលនយោបាយផ្សេងមួយចំនួន ដើម្បីឆ្លើយតបទៅនឹងការគំរាមកំហែងរបស់សហរដ្ឋអាមេរិក ក្នុងការដាក់ពន្ធនាំចូល ១០% បន្ថែមលើទំនិញរបស់ចិន ដោយសារតែបញ្ហាថ្នាំញៀន fentanyl”។ កាសែតដដែលនេះ បាននិយាយទៀតថា ផលិតផលកសិកម្ម និងស្បៀងអាហាររបស់សហរដ្ឋអាមេរិក ទំនងជានឹងត្រូវបញ្ចូលក្នុងបញ្ជីពន្ធគយសងសឹករបស់រដ្ឋភិបាលចិននេះ។
រម្លឹកផងដែរថាកាលពីសប្តាហ៍មុន ប្រធានាធិបតីអាមេរិក លោក ដូណាល់ ត្រាំ បានប្រកាសថា យកពន្ធនាំចូល ២៥% លើទំនិញពីប្រទេសម៉ិកស៊ិក និងកាណាដា ដែលនឹងត្រូវចូលជាធរមាននៅថ្ងៃទី៤ ខែមីនានេះ។ ស្របពេលជាមួយគ្នានោះ ប្រទេសចិន ក៏នឹងទទួលរងនូវសម្ពាធពន្ធបន្ថែម ១០% នៅថ្ងៃដដែលនោះផងដែរ ខណ:កាលពីមុន ទំនិញចិនទាំងអស់ដែលនាំចូលអាមេរិកត្រូវបង់ពន្ធបន្ថែមត្រឹមតែ ១០% ប៉ុណ្ណោះ ដូច្នេះវាមានន័យថាចាប់ពីថ្ងៃទី៤ ខែកុម្ភ:នេះតទៅ ចិននឹងត្រូវបង់ពន្ធលើទំនិញនាំចូលខ្លួនសរុបដល់ទៅ ២០%។
គួរឲ្យដឹងថា ប្រទេសចិនគឺជាប្រទេសនាំចូលកសិផលធំជាងគេលើពិភពលោក និងជាទីផ្សារដ៏ធំបំផុតសម្រាប់ផលិតផលកសិកម្មរបស់សហរដ្ឋអាមេរិក ដែលជាវិស័យមួយតែងតែបានគេលើកយកមកធ្វើការការរិះគន់អស់រយ:ពេលជាយូរមកហើយ នៅពេលដែលភាពតានតឹងពាណិជ្ជកម្មរវាងប្រទេសទាំងពីរ កាន់តែកើនឡើងខ្លាំង។
កាលពីឆ្នាំមុន ប្រទេសចិនបានទិញផលិតផលកសិកម្មរបស់សហរដ្ឋអាមេរិកសរុបចំនួន ២៩,២ន់លានដុល្លារ ពោលគឺបានធ្លាក់ចុះ ១៤% ធៀបនឹងរយៈពេលដូចគ្នាកាលពីឆ្នាំ២០២៣។
ជម្រាបជូនផងដែរ ក្រោយពីរដ្ឋបាលលោក ត្រាំ បានប្រកាសដាក់ចេញពន្ធ ១០% លើចិនមក រដ្ឋាភិបាលទីក្រុងប៉េកាំង ក៏បានដាក់ចេញវិធានការឆ្លើយតបវិញមួយចំនួនរួចរាល់ហើយផងដែរ ដូចជាការយកពន្ធលើធ្យូងថ្ម និងឧស្ម័នធម្មជាតិ (LNG) ១៥% ,អត្រាពន្ធសម្រាប់ប្រេងឆៅ គ្រឿងចក្រកសិកម្ម និងប្រភេទរថយន្តមួយចំនួន ១០% ,លោហធាតុសំខាន់ៗជាច្រើនប្រភេទត្រូវបានហាមឃាត់មិនឲ្យនាំចេញ ខណ:ពេលដែលក្រុមហ៊ុន Google ត្រូវបានរងការស៊ើបអង្កេតពីបទប្រឆាំងនឹងការទុកចិត្ត ហើយក្រុមហ៊ុនខ្នាតយក្សអាមេរិកពីរផ្សេងទៀត ក៏ត្រូវបានដាក់ក្នុងបញ្ជីខ្មៅរបស់ចិន ផងដែរ៕
