ក្រុមហ៊ុន Ford Motor កាលពីថ្ងៃចន្ទ ទី៤ ខែកុម្ភ:កន្លងទៅ បានរាយការណ៍ពីការធ្លាក់ចុះប្រហែល ៩% នៃការលក់រថយន្តសរុបរបស់ខ្លួននៅទូទាំងពិភពលោក ក្នុងខែកុម្ភ: មកនៅត្រឹមចំនួនប្រមាណ ១៥៨ ៦៧៥ គ្រឿង ពោលគឺបានធ្លាក់ចុះពីចំនួនលក់ ១៧៤ ១៩២ គ្រឿង បើធៀបទៅនឹងរយ:ពេលដូចគ្នា កាលពីឆ្នាំមុន។ នេះបើតាមការចុះផ្សាយពីសារព័ត៌មាន Reuters។
ជុំវិញការធ្លាក់ចុះនេះ បានកើតឡើង ចំពេលក្រុមហ៊ុនផលិតរថយន្តខ្នាតយក្សរបស់សហរដ្ឋអាមេរិកមួយនេះ បាននឹងកំពុងព្យាយាមកាត់បន្ថយការចំណាយរបស់ខ្លួន ចំពេលមានការប្រាក់ទាបសម្រាប់ការទិញរថយន្តថ្មី ក៏ដូចជាទប់ទល់ទៅនឹងផលប៉ះពាល់នៃផែនការពន្ធថ្មីរបស់ប្រធានាធិបតីលោក ដូណាល់ ត្រាំ លើការនាំចូលពីប្រទេសកាណាដា និងម៉ិកស៊ិកផងដែរ។
យ៉ាងណាមិញ ចំពោះការលក់អគ្គិសនីរបស់ក្រុមហ៊ុន Ford ដែលរួមមានរថយន្ត EV សុទ្ធ ដូចជារថយន្តភីកអាប់ F-150 Lightning និងរថយន្ត Mustang Mach-E និងរថយន្តប្រភេទកូនកាត់ Hybrid បានកើនឡើងប្រហែល ២៣% ។ ប៉ុន្តែទោះជាយ៉ាងណាក៏ដោយ ចំពោះការលក់រថយន្តម៉ូដែលដែលប្រើសាំងរបស់ខ្លួន បានធ្លាក់ចុះជិត ១៣% មកនៅត្រឹមចំនួន ១៣៥ ៩៩២ គ្រឿង ប៉ុណ្ណោះ៕
