រោងចក្រមួយនៅក្នុងប្រទេសចិន បានបង្ហាញពីដំណាក់កាលថ្មីមួយនៃឧស្សាហកម្មដោយស្វ័យប្រវត្តិ ពោលគឺជាកន្លែងមួយដែលមិនចាំបាច់ត្រូវការកម្មករធ្វើការនោះឡើយ។ ហើយឧស្សាហកម្មបែបនេះ ត្រូវបានគេដាក់ឈ្មោះថា “រោងចក្រងងឹត” ដោយសារតែវាដំណើរការដោយបញ្ញាសិប្បនិម្មិត (AI) និងមនុស្សយន្តទាំងស្រុង និងមិនចាំបាច់ត្រូវបើកភ្លើងបំភ្លឺ មនុស្សធ្វើការងារ ការសម្រាកញុំអាហារថ្ងៃត្រង់ ឬច្បាប់ការងារអ្វីនោះឡើយ។
គួរឲ្យដឹងផងដែរថា Dark Factory ឬរោងចក្រងងឹតនេះ គឺអាចដំណើរការក្នុងស្ថានភាពងងឹតទាំងស្រុង ដោយប្រើមនុស្សយន្តស្វ័យប្រវត្តិ និងមិនចាំបាច់ត្រូវការពន្លឺនោះឡើយ។ ហើយរោងចក្រដំបូងគេបំផុតដែលកំពុងអនុវត្ត Dark Factory នេះ គឺមានទីតាំងនៅទីក្រុង Changping ប្រទេសចិន ដែលជាមជ្ឈមណ្ឌលផលិតកម្មជំនាន់ក្រោយ ប្រើប្រាស់បច្ចេកវិទ្យា AI និងការផ្ទុកទិន្នន័យទ្រង់ទ្រាយធំ ដើម្បីសម្រួលដល់ការផលិត 24/7 ។ មិនដូចរោងចក្រប្រពៃណីទេ រោងចក្រនេះគឺពឹងផ្អែកតែលើកម្លាំងម៉ាស៊ីនសម្រាប់អ្វីៗគ្រប់យ៉ាង ដោយរាប់ចាប់ពីការគ្រប់គ្រងសម្ភារៈ រហូតដល់ការផ្គុំរូបរាងផលិតផលចុងក្រោយ។
យ៉ាងណាមិញ ក្រុមហ៊ុនអេឡិចត្រូនិកខ្នាតយក្សរបស់ចិន Xiaomi បានដឹកនាំបដិវត្តន៍ Dark Factory នេះ ដោយបានបើកដំណើរការឧបករណ៍ស្វ័យប្រវត្តិពេញលេញនៅក្នុងរោងចក្រដែលមានសមត្ថភាពអាចផលិតស្មាតហ្វូនបានមួយគ្រឿងក្នុងមួយវិនាទី។ រោងចក្រនេះរួមបញ្ចូលទាំងប្រព័ន្ធកែសំរួលខ្លួនឯងដោយ AI ដែលជួយបង្កើនប្រសិទ្ធភាពផលិតកម្មបន្ថែម និងកាត់បន្ថយកំហុស។ លើសពីនេះទៀត Xiaomi ក៏បានអនុវត្តប្រព័ន្ធបោសសម្អាតដោយស្វ័យប្រវត្តិយ៉ាងពេញលេញ ដោយពុំចាំបាច់តម្រូវឲ្យមានបុគ្គលិកសម្អាតនោះឡើយ។
ទន្ទឹមនឹងនេះ ដើម្បីបន្តគាំទ្រដល់ទស្សនវិស័យនៃការដំណើរការរោងចក្រងងឹតនេះ ក្រុមហ៊ុន Xiaomi បាននោះទុនវិនិយោគចំនួន ២,៤ពាន់លានយ៉ន់ (៣៣០លានដុល្លារ) នៅក្នុងរោងចក្រដែលមានទំហំ ៨១ ០០០ ម៉ែត្រការ៉េ ដែលអាចមានសមត្ថភាពផលិតស្មាតហ្វូនបានចំនួនរហូតដល់ទៅ ១០ លានគ្រឿងក្នុងមួយឆ្នាំ។
ជម្រាបជូនផងដែរថា ក្រៅតែពី Xiaomi ក្រុមហ៊ុនខ្នាតយក្សរបស់ចិនផ្សេងទៀត ក៏កំពុងបន្តបោះទុនវិនិយោគលើគ្រឿងបរិក្ខារដែលដំណើរការដោយ AI ស្រដៀងគ្នានេះផងដែរ ដោយកំណត់និន្នាការមួយដែលអាចផ្លាស់ប្តូរកម្លាំងពលកម្មពិភពលោក នាពេលអនាគត៕
