រដ្ឋាភិបាលវៀតណាម បានឲ្យដឹងនៅថ្ងៃពុធថា ខ្លួននឹងអនុញ្ញាតឲ្យក្រុមហ៊ុន SpaceX បើកដំណើរការសេវាកម្មអ៊ីនធើណិតតាមផ្កាយរណប Starlink របស់ពួកគេ នៅលើកម្រិតមូលដ្ឋានសាកល្បង នៅក្នុងប្រទេសជាលើកដំបូង។ នេះបើតាមការចុះផ្សាយពីសារព័ត៌មាន CNA។
រដ្ឋាភិបាលវៀតណាម បាននិយាយនៅក្នុងសេចក្តីថ្លែងការណ៍មួយថា បច្ចុប្បន្ននេះមិនមានច្បាប់កំណត់ទៅលើភាពជាម្ចាស់របស់ក្រុមហ៊ុនបរទេស នៅក្នុងការផ្តល់សេវាកម្មណាមួយនោះឡើយ ហើយរយ:ពេលសាកល្បងនឹងមានសុពលភាពរហូតដល់ចុងឆ្នាំ២០៣០។
យ៉ាងណាមិញ ជុំវិញការអនុញ្ញាតឲ្យក្រុមហ៊ុនអាវកាសខ្នាតយក្សរបស់អាមេរិក បើកដំណើរការសេវាអ៊ីនធឺណិតរបស់ខ្លួននៅក្នុងប្រទេសវៀតណាមនេះ ត្រូវបានក្រុមអ្នកវិភាគមួយចំនួនមើលឃើញថា ជាវិធានការមួយក្នុងចំណោមវិធានការសំខាន់ៗផ្សេងទៀតដែលមជ្ឈមណ្ឌលឧស្សាហកម្មអាស៊ីអាគ្នេយ៍ បាននិងកំពុងអនុវត្ត ដើម្បីចៀសវាងផលប៉ះពាល់ ដោយសារផែនការពន្ធរបស់សហរដ្ឋអាមេរិក។
គួរឲ្យដឹងផងដែរថា វានៅមិនទាន់ត្រូវបានគេដឹងច្បាស់នៅឡើទេថា តើក្រុមហ៊ុន SpaceX បានដាក់ពាក្យស្នើសុំអាជ្ញាប័ណ្ណដើម្បីបើកដំណើរការសេវាកម្មរបស់ខ្លួននៅក្នុងប្រទេសវៀតណាម ឬយ៉ាងណានោះ។ ហើយបើតាមសេចក្តីសម្រេចរបស់រដ្ឋាភិបាលវៀតណាម បានកំណត់ចំនួនអ្នកជាវសេវាកម្មរបស់ Starlink ត្រឹមតែ ៦០០ ០០០ គ្រឿងប៉ុណ្ណោះ សម្រាប់រយៈពេលសាកល្បងដំបូងនេះ។
ជម្រាបជូនថា គិតមកដល់ពេលបច្ចុប្បន្ននេះ ក្រុមហ៊ុន Starlink បានបើកប្រតិបត្តិការនៅក្នុងទីផ្សារជាង ១២០ រួចមកហើយ នៅទូទាំងពិភពលោក៕
