ក្រុមហ៊ុនខ្នាតយក្សអាមេរិក Apple បានប្រកាសថាទូរស័ព្ទ iPhone 16 ស៊េរីរបស់ខ្លួន នឹងមានដាក់លក់នៅក្នុងប្រទេសឥណ្ឌូណេស៊ី ចាប់ពីថ្ងៃទី១១ ខែមេសា បន្ទាប់ពីច្បាប់ហាមឃាត់ការលក់ដ៏តឹងរ៉ឹងរបស់ប្រទេសនេះ ត្រូវបានដកចេញវិញ។ នេះបើតាមការចុះផ្សាយពីសារព័ត៌មាន AFP។
រដ្ឋាភិបាលឥណ្ឌូណេស៊ី កាលពីខែតុលា បានប្រកាសចេញច្បាប់ហាមឃាត់ការធ្វើទីផ្សារ និងការលក់ទូរស័ព្ទ iPhone សម្រាប់ម៉ូដែលនេះ បន្ទាប់ពី Apple បានខកខានក្នុងការបំពេញតាមច្បាប់ដែលតម្រូវឲ្យប្រើប្រាស់ ៤០% នៃទូរស័ព្ទដែលត្រូវបានផលិតចេញពីគ្រឿងបង្គុំនៅក្នុងស្រុក។
ទោះជាយ៉ាងណាក៏ដោយ Apple បានធ្វើកិច្ចព្រមព្រៀងជាមួយរដ្ឋាភិបាលឥណ្ឌូណេស៊ីកាលពីខែមុន ដើម្បីវិនិយោគនៅក្នុងប្រទេសនេះ ជាមួយចំនួនទឹកប្រាក់សរុបប្រមាណ ២៨០លានដុល្លារ បន្ទាប់ពីការជាប់គាំងជាច្រើនខែ។
យ៉ាងណាមិញ ដោយបាននិយាយនៅក្នុងសេចក្តីថ្លែងការណ៍មួយ កាលពីថ្ងៃទី២៦ ខែមីនាកន្លងទៅក្រុមហ៊ុន Apple បានបញ្ជាក់ថា ថ្ងៃនេះក្រុមហ៊ុនបានប្រកាសថារាល់ iPhone 16 គ្រប់ស៊េរីទាំងអស់ នឹងមានលក់នៅក្នុងប្រទេសឥណ្ឌូណេស៊ីឡើងវិញហើយ ចាប់ពីថ្ងៃទី១១ ខែមេសាតទៅ។
ជាមួយគ្នានេះ ក្រសួងឧស្សាហកម្មឥណ្ឌូណេស៊ី ក៏បាននិយាយនៅក្នុងខែនេះផងដែរថា ខ្លួនបានអនុម័តវិញ្ញាបនបត្រក្នុងស្រុកសម្រាប់ផលិតផល Apple ច្រើនជាងដប់ ខណ:កាលពីសប្តាហ៍មុន ក្រសួងទំនាក់ទំនង និងកិច្ចការឌីជីថល បាននិយាយថា Apple ក៏ទទួលបានវិញ្ញាបនបត្រដែលត្រូវការសម្រាប់ឧបករណ៍ទូរគមនាគមន៍ទាំងអស់របស់ខ្លួន ផងដែរ៕
