យោងតាមការចុះផ្សាយពីសារព័ត៌មាន Forbes បានបង្ហាញឲ្យដឹងថា ទ្រព្យសម្បត្តិរបស់ប្រធានាធិបតីអាមេរិក លោក ដូណាល់ ត្រាំ បានកើនឡើងដល់ទ្វេដងឯណោះ ក្នុងរយ:ពេលត្រឹមតែមួយឆ្នាំ បន្ទាប់ពីត្រូវបានជំរុញដោយប្រភពចំណូលធំៗ ដូចជាក្រុមហ៊ុនប្រព័ន្ធផ្សព្វផ្សាយសង្គម និងក្រុមហ៊ុនប្តូររូបិយប័ណ្ណឌីជីថលរបស់ខ្លួនជាដើម។
ទស្សនាវដ្តី Forbes កាលពីពេលថ្មីៗនេះ បានបង្ហាញពីបញ្ជីឈ្មោះមហាសេដ្ឋីកំពូលៗរបស់ពិភពលោក សម្រាប់ឆ្នាំ២០២៥ ដោយក្នុងចំណោមនោះ ក៏មានឈ្មោះរបស់ប្រធានាធិបតី លោក ត្រាំ ផងដែរ ជាមួយទ្រព្យសម្បត្តិសរុបប្រមាណ ៥,១ពាន់លានដុល្លារ និងជាប់ចំណាត់ថ្នាក់លេខ ៧០០ នៅទូទាំងពិភពលោក។ តួលេខនេះ បានកើនឡើងទ្វេដង បើធៀបទៅនឹងទ្រព្យសម្បត្តិរបស់លោក ត្រាំ ដែលមានចំនួនត្រឹមតែ ២,៣ពាន់លានដុល្លារ កាលពីឆ្នាំមុន។
គួរឲ្យដឹងផងដែរេថា លោក ត្រាំ មានអាជីវកម្មធំៗយ៉ាងច្រើន ជាពិសេសរូបលោកមានគឺមានភាពល្បីល្បាញខាងវិស័យអចលនទ្រព្យតែម្តង។ ប៉ុន្តែបើយោងតាមទស្សនាវដ្តី Forbes បានបង្ហាញឲ្យដឹងថា ក្រុមហ៊ុន Trump Media and Technology Group ដែលជាក្រុមហ៊ុនមេរបស់បណ្តាញសង្គម Truth Social បច្ចុប្បន្នត្រូវបានចាត់ទុកថាជាប្រភពចំណូលដ៏ធំបំផុត សម្រាប់ប្រធានាធិបតីអាមេរិករូបនេះទៅវិញទេ។ លោកត្រាំ កាន់កាប់ភាគហ៊ុននៅក្នុង Truth Social ដែលមានតម្លៃសរុបប្រមាណ ២,៦ពាន់លានដុល្លារ។
យ៉ាងណាមិញ លោក ត្រាំ ក៏នៅមានប្រភពចំណូលជាច្រើនទៀតផងដែរ ដូចជាការកាន់កាប់អគារល្បីៗជាច្រើន នៅក្នុងទឹកដីសហរដ្ឋអាមេរិក រួមទាំងផ្ទះ និងដីធ្លីទំនេរជាច្រើន នៅក្នុងសហរដ្ឋអាមេរិកផងដែរ។ ដោយអចលនទ្រព្យទាំងនេះ មានតម្លៃរាប់លានដុល្លារឯណោះ។
លើសពីនេះទៀត លោក ត្រាំ ក៏ជាម្ចាស់ទីលានវាយកូនហ្គោល និងរមណីយដ្ឋានដ៏ល្បីល្បាញ Mar-a-Lago និង Trump National Doral ផងដែរ។ ហើយរមណីយដ្ឋានធំៗទាំងនេះ ក៏បាននាំមកនូវប្រាក់ចំណេញរាប់សិបលានដុល្លារក្នុងមួយឆ្នាំៗ ជូនដល់បុរសវ័យ ៧៨ឆ្នាំរូបនេះ ផងដែរ៕
