បច្ចុប្បន្ន វៀតណាម មាន​បុគ្គលត្រឹម ៥រូបប៉ុណ្ណោះ ជាប់ក្នុងបញ្ជីមហាសេដ្ឋីកំពូលរបស់ពិភពលោក

អន្តរជាតិ

យោងតាមការចុះផ្សាយពី Forbes បានបង្ហាញឲ្យដឹងថា វៀតណាម បច្ចុប្បន្ននេះ នៅសល់បុគ្គលត្រឹមតែ ៥រូបប៉ុណ្ណោះ ដែលជាប់នៅក្នុងបញ្ជីឈ្មោះមហាសេដ្ឋីលំដាប់កំពូលរបស់ពិភពលោក។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ទស្សនាវដ្ដី Forbes ទើបតែបានប្រកាសបញ្ជីឈ្មោះមហាសេដ្ឋីលំដាប់កំពូលរបស់ពិភពលោក សម្រាប់ឆ្នាំ២០២៥ នេះ ខណ:ប្រទេសវៀតណាម បានធ្លាក់ចុះចំនួនបុគ្គលដែលជាប់ក្នុងបញ្ជីនេះម្នាក់ បើធៀបនឹងឆ្នាំមុន។

យ៉ាងណាមិញ ចំពោះមហាសេដ្ឋីវៀតណាមដែលត្រូវបានដាក់ឈ្មោះចូលក្នុងបញ្ជី រួមមានប្រធានក្រុមហ៊ុន Vingroup លោក Pham Nhat Vuong បច្ចុប្បន្ន មានទ្រព្យសម្បត្តិសរុប ៦,៥ពាន់លានដុល្លារ ពោលគឺបានកើនឡើងពីចំនួន ២,១ពាន់លានដុល្លារ ធៀបទៅនឹងឆ្នាំមុន។

ប្រធានក្រុមហ៊ុន VietJet Air លោកស្រី Nguyen Thi Phuong Thao មានទ្រព្យសម្បត្តិសរុប ២,៨ពាន់លានដល្លារ , ប្រធានក្រុមហ៊ុនដែក Hoa Phat លោក Tran Dinh Long មានទ្រព្យសម្បត្តិសរុប ២,៤ពាន់លានដុល្លារ , ប្រធានក្រុមហ៊ុន Techcombank លោក Ho Hung Anh មានទ្រព្យសម្បត្តិសរុប ២ពាន់លានដុល្លារ និងប្រធានក្រុមហ៊ុន Masan លោក Nguyen Dang Quang មានទ្រព្យសម្បត្តិសរុប ១ពាន់លានដុល្លារ។

គួរឲ្យដឹងផងដែរថា បុគ្គលដែលអាចជាប់ក្នុងបញ្ជីមហាសេដ្ឋីកំពូលៗលើពិភពលោក របស់ Forbes នេះបាន គឺដោយផ្នែកលើការវាយតម្លៃសំខាន់ទៅលើទំហំទ្រព្យសម្បត្តិរបស់បុគ្គលម្នាក់ៗ តាមរយ:តម្លៃភាគហ៊ុន និងអត្រាប្តូរប្រាក់ គិតត្រឹមថ្ងៃទី៧ ខែមីនា។

ជម្រាបជូនថា នៅឆ្នាំនេះ ពិភពលោកមានមហាសេដ្ឋីសរុបចំនួន ៣ ០២៨ នាក់ ពោលគឺកើនឡើងច្រើនជាងឆ្នាំមុនចំនួន ២៤៧ នាក់។ ហើយនេះជាលើកដំបូងផងដែរ ដែលចំនួនមហាសេដ្ឋីទូទាំងពិភពលោកមានលើសពី ៣ ០០០ នាក់។ ទន្ទឹមនឹងនេះ សម្រាប់ទ្រព្យសម្បត្តិសរុបរបស់មហាសេដ្ឋីទាំងអស់ ក៏បានកើនឡើងដ៏ចំនួនច្រើនបំផុតមិនធ្លាប់មានផងដែរ រហូតដល់ប្រមាណ ១៦,១ទ្រីលានដុល្លារ៕