យោងតាមឯកអគ្គរដ្ឋទូតចិន ប្រចាំនៅទីក្រុងញូវដេលី បាននិយាយថា ប្រទេសរបស់ខ្លួន បានត្រៀមខ្លួនរួចជាស្រេចហើយ ក្នុងការនាំចូលផលិតផលរបស់ឥណ្ឌាបន្ថែមទៀត និងពង្រឹងកិច្ចសហប្រតិបត្តិការពាណិជ្ជកម្ម ផងដែរ។ នេះបើតាមការចុះផ្សាយពីសារព័ត៌មាន Reuters។
ប្រទេសមហាអំណាចសេដ្ឋកិច្ចនៅអាស៊ីទាំងពីរនេះ ហាក់កំពុងចាត់វិធានការដើម្បីកសាងទំនាក់ទំនងរវាងគ្នាឡើងវិញ បន្ទាប់ពីការប៉ះទង្គិចនៅតាមបណ្តោយព្រំដែនហិមាល័យ ក្នុងអំឡុងឆ្នាំ ២០២០ ដែលបានធ្វើឲ្យទំនាក់ទំនងរបស់ពួកគេធ្លាក់ចុះយ៉ាងខ្លាំង។
ជាមួយគ្នានេះ ឯកអគ្គរដ្ឋទូតចិន លោក Xu Feihong បានប្រាប់កាសែត Global Times ថា ៖”យើងមានឆន្ទៈក្នុងការធ្វើការជាមួយភាគីឥណ្ឌាដើម្បីពង្រឹងកិច្ចសហប្រតិបត្តិការជាក់ស្តែង ក្នុងវិស័យពាណិជ្ជកម្ម និងវិស័យផ្សេងទៀត និងដើម្បីនាំចូលផលិតផលឥណ្ឌាបន្ថែមទៀតដែលសមស្របទៅនឹងទីផ្សារប្រទេសចិន” ។
លោក Xu បានបន្តទៀតថា ៖”យើងក៏សូមស្វាគមន៍ដល់ក្រុមហ៊ុនឥណ្ឌាបន្ថែមទៀត ដើម្បីឆ្លងកាត់ជួរភ្នំហិមាល័យ និងបន្តស្វែងរកឱកាសដើម្បីធ្វើប្រតិបត្តិការនៅក្នុងប្រទេសចិន ដោយចែករំលែកនូវភាគលាភនៃការអភិវឌ្ឍរបស់ប្រទេសចិន” ។
រម្លឹកផងដែរថា កាលពីខែមករា ភាគីទាំងពីរស្រុះស្រួលគ្នាថា នឹងបន្តការហោះហើរត្រង់ឡើងវិញ បន្ទាប់ពីបានឈានដល់កិច្ចព្រមព្រៀងមួយ ក្នុងខែតុលា ទាក់ទងនឹងការល្បាតព្រំដែនហិមាល័យរបស់ពួកគេ។
លោក Xu ក៏បានបន្ថែមទៀតថា ប្រទេសចិនសង្ឃឹមថា រដ្ឋាភិបាលឥណ្ឌា នឹងបង្កើតបរិយាកាសធុរកិច្ចប្រកបដោយភាពយុត្តិធម៌ និងតម្លាភាពសម្រាប់ក្រុមហ៊ុនចិន និងពង្រីកកិច្ចសហប្រតិបត្តិការដែលអាចផ្តល់ផលប្រយោជន៍ឲ្យគ្នាទៅវិញទៅមក បន្ថែមទៀត៕
