យោងតាមមន្ត្រីជាន់ខ្ពស់របស់ប្រទេសថៃ បាននិយាយនៅថ្ងៃពុធ ទី២ ខែមេសាថា ប្រទេសរបស់ខ្លួន អាចនឹងទទួលរងការខាតបង់ពីការនាំចេញចន្លោះពី ៧ពាន់លានដុល្លារ ទៅ ៨ពាន់លានដុល្លារ ដោយសារតែវិធានការពន្ធគយរបស់សហរដ្ឋអាមេរិក។ នេះបើតាមការចុះផ្សាយពីសារព័ត៌មាន CNA។
រដ្ឋមន្ត្រីក្រសួងពាណិជ្ជកម្ម លោក Vuttikrai Leeviraphan បាននិយាយ នៅមុនការប្រកាសចេញផែនការពន្ធគយថ្មីរបស់ប្រធានាធិបតីអាមេរិក លោក ដូណាល់ ត្រាំ ថា ការនាំចេញគ្រឿងអេឡិចត្រូនិក ជាពិសេសបន្ទះឈីប Semiconductorរបស់ថៃ អាចប្រឈមមុខទៅនឹងការយកពន្ធដល់ទៅ ២៥% ពីសហរដ្ឋអាមេរិក។
មិនតែប៉ុណ្ណោះ លោក Vuttikrai បាននិយាយទៀតថា ៖” បច្ចុប្បន្នប្រទេសថៃ កំពុងប្រមូលពន្ធប្រហែល ១១% ខ្ពស់ជាងសហរដ្ឋអាមេរិក ក្នុងវិស័យកសិកម្ម និងឧស្សាហកម្ម។ ដូច្នេះហើយ ប្រសិនបើយើងទទួលរងផលប៉ះពាល់ជាមួយនឹងពន្ធ ១១% ពីលើទៀត នោះយើងអាចនឹងជួបនូវការខាតបង់បង់ប្រហែល ៧ ទៅ ៨ពាន់លានដុល្លារ”។
ប្រទេសថៃ ចង់ចៀងវាងពន្ធគយរបស់សហរដ្ឋអាមេរិក ហើយបាននិយាយថា ខ្លួននឹងព្យាយាមបង្កើនការនាំចូលផលិតផលបន្ថែមទៀត ដូចជាពោត សណ្តែកសៀង ប្រេងឆៅ និងផអេតាន ដើម្បីបង្រួមអតិរេកពាណិជ្ជកម្មជាមួយសហរដ្ឋអាមេរិក។ ជាមួយគ្នានោះ សហរដ្ឋអាមេរិក បានដាក់ឱនភាពរបស់ខ្លួនជាមួយប្រទេសថៃចំនួន ៤៥,៦ពាន់លានដុល្លារ។
មិនតែប៉ុណ្ណោះ លោក Vuttikira បាននិយាយទៀតថា ប្រទេសថៃ ក៏កំពុងពិចារណាផងដែរអំពីការនាំចូលសាច់គោ និងស្រារបស់សហរដ្ឋអាមេរិក ក៏ដូចជាការកាត់បន្ថយពន្ធលើផលិតផលរបស់សហរដ្ឋអាមេរិកមួយចំនួន ផងដែរ។
កន្លងមក ប្រទេសថៃ មានបំណងកាត់បន្ថយអតិរេកពាណិជ្ជកម្មរបស់ខ្លួនជាមួយសហរដ្ឋអាមេរិកមកត្រឹម ២០ពាន់លានដុល្លារ តាមរយៈការនាំចូលផលិតផលរបស់សហរដ្ឋអាមេរិកបន្ថែមទៀត ប៉ុន្តែហាក់មិនបានផ្តល់ពេលវេលាជាក់លាក់ណាមួយ សម្រាប់ការកាត់បន្ថយនេះនោះទេ។
ជម្រាបជូនថា សហរដ្ឋអាមេរិកគឺជាទីផ្សារនាំចេញដ៏ធំបំផុតរបស់ប្រទេសថៃ ក្នុងឆ្នាំ២០២៤ ដែលស្មើនឹង ១៨,៣% នៃការនាំចេញសរុប ឬស្មើនឹងចំនួនទឹកប្រាក់ ៥៤,៩ពាន់លានដុល្លារ៕
