ប្រធានាធិបតីអាមេរិកលោក ដូណាល់ ត្រាំ នៅថ្ងៃព្រហស្បតិ៍ ទី៣ ខែមេសា នេះ បានប្រកាសដំឡើងពន្ធគយទ្រង់ទ្រាយធំបន្ថែមទៀត ជាមួយនឹងការយក ១០% លើការនាំចូលទំនិញពីជុំវិញពិភពលោក និងការយកពន្ធបន្ថែមយ៉ាងធ្ងន់ធ្ងរលើប្រទេសដែលជាដៃគូពាណិជ្ជកម្មសំខាន់ៗ ផងដែរ។ នេះបើតាមការចុះផ្សាយពីសារព័ត៌មាន AFP។
ដោយកាន់តារាងដំឡើងពន្ធគយថ្មីដ៏ធំទូលាយ បង្ហាញនៅមុខវិមាន Rose Garden នៅព្រឹកថ្ងៃព្រហស្បតិ៍នេះ លោក ត្រាំ បានបង្ហាញពីការបញ្ជីឈ្មោះប្រទេសដែលនឹងត្រូវយកពន្ធពិសេស ទៅលើដៃគូពាណិជ្ជកម្មសំខាន់ៗរបស់ប្រទេសចិន និងសហភាពអឺរ៉ុប ដែលជាផែនការមួយត្រូវបានលោក ត្រាំ ហៅថា “ទិវារំដោះអាមេរិក”។
យ៉ាងណាមិញ ក្នុងចំណោមដៃគូពាណិជ្ជកម្មទាំងអស់ លោក ត្រាំ បានបញ្ជាក់ថា មានដៃគូពាណិជ្ជកម្មចំនួន៨ ដែលនឹងត្រូវយកពន្ធគយច្រើនជាងគេ ដោយចាត់ទុកថាដៃគូទាំងនោះ ជាអ្នកបំពាន និងបានធ្វើឲ្យខូចដល់សេដ្ឋកិច្ចរបស់អាមេរិក។
ចំពោះពន្ធឆ្លើយតបចុងក្រោយនេះ ដៃគូពាណិជ្ជកម្មសំខាន់ដែលត្រូវទទួលរងនូវអត្រាពន្ធគយពិសេសនោះ រួមមាន៖
-សហភាពអឺរ៉ុប ២០%
-ចិន ៣៤%
-វៀតណាម ៤៦%
-ថៃ ៣៦%
-ជប៉ុន ២៤%
-កម្ពុជា ៤៩%
-អាហ្វ្រិកខាងត្បូង ៣០%
-តៃវ៉ាន់ ៣២%
ជម្រាបជូនផងដែរថា យោងតាមការចុះផ្សាយពីសារព័ត៌មាន CNN បានដកស្រង់សម្ដីមន្ត្រីរដ្ឋាភិបាលអាមេរិកម្នាក់ដែលនិយាយថាវិធានការពន្ធគយថ្មីនេះ នឹងត្រូវចូលជាធរមាន ចាប់ពីថ្ងៃទី៩ ខែមេសាតទៅ៕
