អត្រាពន្ធរបស់សហរដ្ឋអាមេរិក លើការនាំចូលទំនិញទាំងអស់ បានកើនឡើងដល់ ២២% ពីកម្រិតត្រឹមតែ ២,៥% ប៉ុណ្ណោះ នៅក្នុងឆ្នាំ២០២៤ ក្រោមផែនការពន្ធគយសកលថ្មីដែលដាក់ដោយប្រធានាធិបតីលោក ដូណាល់ ត្រាំ។ នេះបើតាមរបាយការណ៍ពី Fitch Ratings។
ប្រធានាធិបតី លោក ត្រាំ បាននិយាយកាលពីថ្ងៃពុធថា សហរដ្ឋអាមេរិកនឹងដាក់ពន្ធជាមូលដ្ឋាន ១០% លើការនាំចូលទាំងអស់ និងអត្រាខ្ពស់ជាងនេះទៅលើដៃគូពាណិជ្ជកម្មដ៏ធំៗបំផុតជាច្រើនរបស់ប្រទេស។
ហើយយ៉ាងណាមិញ បើយោងតាមទីភ្នាក់ងារវាយតម្លៃឥណទានអាមេរិក Fitch Ratings បានបង្ហាញឲ្យឹងថា អត្រាពន្ធដ៏មានប្រសិទ្ធភាពរបស់សហរដ្ឋអាមេរិកលើការនាំចូលទាំងអស់ ឥឡូវនេះនឹងមានកម្រិត ២២% ។
ទន្ទឹមនឹងនេះ លោក Olu Sonola ប្រធានផ្នែកស្រាវជ្រាវសេដ្ឋកិច្ចរបស់ Fitch បាននិយាយនៅក្នុងសេចក្តីថ្លែងការណ៍មួយ បន្ទាប់ពីការប្រកាសរបស់លោក ត្រាំ សម្រាប់ពន្ធនាំចូលសកលចំនួន ១០% និងអត្រាពន្ធខ្ពស់ផ្សេងទៀតសម្រាប់ដៃគូពាណិជ្ជកម្មជាច្រើនថា ៖” អត្រាពន្ធចុងក្រោយនេះ ត្រូវបានគេមើលឃើញថាមានកម្រិតខ្ពស់បំផុតមិនធ្លាប់មាន ពោលគិតចាប់តាំងពីឆ្នាំ១៩១០ មកម្លេះ”។
លោក Sonola បាននិយាយទៀតថា ៖”នេះគឺជាការផ្លាស់ប្តូរហ្គេម មិនត្រឹមតែសម្រាប់សេដ្ឋកិច្ចអាមេរិកប៉ុណ្ណោះទេ ប៉ុន្តែសម្រាប់សេដ្ឋកិច្ចពិភពលោក។ ប្រទេសជាច្រើនទំនងជានឹងបញ្ចប់ទៅ ក្នុងវិបត្តិសេដ្ឋកិច្ច។ អ្នកអាចលុបចោលការព្យាករកំណើនសេដ្ឋកិច្ចរបស់ប្រទេសភាគច្រើនវិញ ប្រសិនបើអត្រាពន្ធនេះ នឹងនៅតែបន្តធ្វើឡើង សម្រាប់រយៈពេលវែងបន្ថែមទៀតនោះ”។
ជម្រាបជូនថា យោងតាមសេចក្តីថ្លែងការណ៍របស់សេតវិមានបានឲ្យដឹងថា ពន្ធគយ ១០% ជាមូលដ្ឋានត្រូវបានកំណត់ឲ្យចូលជាធរមាននៅថ្ងៃទី៥ ខែមេសា ហើយអត្រាខ្ពស់សម្រាប់ដៃគូពាណិជ្ជកម្មធំៗ នឹងចាប់ផ្តើមនៅថ្ងៃទី៩ ខែមេសា៕
