Starlink គឺជាក្រុមហ៊ុនផ្តល់សេវាអ៊ីនធើណិតតាមរយ:ផ្កាយរណបអន្តរជាតិដំបូងគេបង្អស់ ដែលត្រូវបានគ្រប់គ្រងទាំងស្រុងដោយក្រុមហ៊ុនអវកាសខ្នាតយក្សអាមេរិក SpaceX របស់មហាសេដ្ឋី Elon Musk ដែលបានចែកចាយសេវាកម្មរបស់ខ្លួនទៅកាន់ប្រទេស និងដែនដីប្រមាណជាង ១០០។
SpaceX បានចាប់ផ្តើមបាញ់បង្ហោះផ្កាយរណប Starlink របស់ខ្លួនជាលើកដំបូង នៅក្នុងឆ្នាំ២០១៩។ ហើយគិតមកត្រឹមខែកញ្ញា ឆ្នាំ២០២៤ ក្រុមហ៊ុនអវកាសនេះ បានបន្តបាញ់បង្ហោះផ្កាយរណបតូចៗ របស់ខ្លួនបន្ថែមទៀតដល់ទៅប្រមាណជាង ៧ ០០០ នៅក្នុងគន្លងផែនការដីទាប (LEO)។
យ៉ាងណាមិញ ផ្កាយរណប Starlink ប្រមាណជិត ១២ ០០០ ត្រូវបានគេគ្រោងនឹងដាក់ពង្រាយបន្ថែម ជាមួយនឹងការពង្រីកនៅពេលក្រោយ អាចឈានដល់ចំនួនសរុបប្រមាណ ៣៤ ៤០០ ផ្កាយរណបឯណោះ។ ជាមួយជោគជ័យដ៏ធំនេះ ក្រុមហ៊ុន SpaceX បានប្រកាសថា សេវាកម្ម Starlink របស់ខ្លួន មានអតិថិជនដល់ជាង ១ លាននាក់ គិតក្នុងខែធ្នូ ឆ្នាំ ២០២២ និងបន្តកើនឡើងដល់ ៤ លាននាក់ ក្នុងខែកញ្ញា ឆ្នាំ២០២៤។
នៅក្នុងខែឧសភា ឆ្នាំ២០១៨ ក្រុមហ៊ុន SpaceX បានប៉ាន់ប្រមាណថា ការចំណាយសរុបនៃការរចនា ការសាងសង់ និងការដាក់ពង្រាយផ្កាយរណប Starlink នេះ មានយ៉ាងហោចណាស់ ១០ពាន់លានដុល្លារ។ ចំពោះប្រាក់ចំណូលទទួលបានពី Starlink ក្នុងឆ្នាំ២០២២ ត្រូវបានគេរាយការណ៍ថាកើនឡើងដល់ ១,៤ពាន់លានដុល្លារ។ ហើយនៅក្នុងឆ្នាំ២០២៥ នេះ ប្រាក់ចំណូលសរុបរបស់ក្រុមហ៊ុន ត្រូវបានគេរំពឹងថាអាចនឹងឈានដល់ ១១,៨ពាន់លានដុល្លារ។
គួរឲ្យដឹងថា Starlink មិនត្រឹមតែត្រូវបានប្រើប្រាស់សម្រាប់ផ្តល់សេវាអ៊ីនធើណិតចំពោះកិច្ចការងារទូទៅប៉ុណ្ណោះទេ ប៉ុន្តែវាក៏ត្រូវបានប្រើប្រាស់យ៉ាងទូលំទូលាយ នៅក្នុងសង្គ្រាមរុស្ស៊ី-អ៊ុយក្រែនផងដែរ នៅពេលដែលសេវាកម្មនេះ ត្រូវបានចុះកិច្ចសន្យាដោយក្រសួងការពារជាតិសហរដ្ឋអាមេរិក។
ជម្រាបជូមផងដែរថា បច្ចុប្បន្ននេះ ក្រុមហ៊ុន SpaceX កំពុងព្យាយាមបន្តចែកចាយសេវាកម្ម Starlink របស់ខ្លួនទៅកាន់ប្រទេសជាច្រើនបន្ថែមទៀត តាមរយ:ការចរចា ដើម្បីទទួលបានអាជ្ញាប័ណ្ណ ធ្វើប្រតិបត្តិការនៅក្នុងប្រទេសទាំងនោះ៕
