តុលាការធម្មនុញ្ញរបស់ប្រទេសកូរ៉េខាត្បូង បានសម្រេចជាឯកច្ឆន្ទហើយ ក្នុងការដកលោក Yoon Suk Yeol ចេញពីតំណែងជាប្រធានាធិបតីផ្លូវការ នៅថ្ងៃសុក្រ ទី៤ ខែមេសានេះ ពោលគឺត្រឹមពេលប៉ុន្មានខែ បន្ទាប់ពីលោកត្រូវបានរងការចោទប្រកាន់ដោយសមាជិកសភា ជុំវិញការដាក់ចេញច្បាប់អាជ្ញាសឹក កាលពីឆ្នាំមុន ដែលបង្កឲ្យមានវិបត្តិនយោបាយដ៏អាក្រក់បំផុតមិនធ្លាប់មានរបស់ប្រទេសនេះ ក្នុងរយៈពេលជាច្រើនទសវត្ស។ នេះបើតាមការចុះផ្សាយពីសារព័ត៌មាន Reuters។
ប្រធានចៅក្រមស្តីទីនៃតុលាការធម្មនុញ្ញកូរ៉េខាងត្បូង លោក Moon Hyung-bae បាននិយាយថា លោក Yoon បានរំលោភបំពានយ៉ាងធ្ងន់ធ្ងរលើកាតព្វកិច្ចរបស់ខ្លួន ក្នុងនាមជាប្រធានាធិបតី ជាមួយនឹងការប្រកាសចេញច្បាប់អាជ្ញាសឹក កាលពីថ្ងៃទី៣ ខែធ្នូរបស់លោក ដោយធ្វើសកម្មភាពហួសពីអំណាចដែលរដ្ឋធម្មនុញ្ញផ្តល់ឲ្យ។ លោក Moon ថែមទាំងបានពិពណ៌នាសកម្មភាពរបស់លោក Yoon ថាជា “បញ្ហាប្រឈមដ៏ធ្ងន់ធ្ងរចំពោះលទ្ធិប្រជាធិបតេយ្យ” ទៀតផង។
មិនតែប៉ុណ្ណោះ លោក Moon ក៏បានបន្ថែមទៀតថា ៖”លោក Yoon បានប្រព្រឹត្តអំពើក្បត់យ៉ាងធ្ងន់ធ្ងរនៃការជឿទុកចិត្តរបស់ប្រជាជនដែលជាសមាជិកអធិបតេយ្យនៃសាធារណរដ្ឋប្រជាធិបតេយ្យ ហើយការប្រកាសច្បាប់អាជ្ញាសឹករបស់លោក បានបង្កើតភាពវឹកវរនៅក្នុងគ្រប់វិស័យនៃសង្គម សេដ្ឋកិច្ច គោលនយោបាយការបរទេស”។
គួរឲ្យដឹងផងដែរថា ជាមួយនឹងការដកតំណែងរបស់លោក Yoon នេះ ការបោះឆ្នោតជ្រើសរើសប្រធានាធិបតីថ្មី នឹងត្រូវធ្វើឡើងក្នុងរយ:ពេល ៦០ថ្ងៃបន្ទាប់ នេះបើយោងតាមច្បាប់រដ្ឋធម្មនុញ្ញរបស់ប្រទេស។
ជម្រាបជូនថា នាយករដ្ឋមន្ត្រី លោក Han Duck-soo នឹងបន្តធ្វើជាប្រធានាធិបតីស្តីទីរបស់ប្រទេសកូរ៉េខាងត្បូងដដែល រហូតដល់ប្រធានាធិបតីថ្មី ចូលកាន់តំណែង៕
