រដ្ឋមន្ត្រីក្រសួងការបរទេស លោក Marco Rubio កាលពីពេលថ្មីៗនេះ បានច្រានចោលនូវមន្ទិលសង្ស័យទាំងឡាយ ពាក់ព័ន្ធទៅនឹងការប្តេជ្ញាចិត្តរបស់សហរដ្ឋអាមេរិក ដោយបញ្ជាក់យ៉ាងច្បាស់ថា ខ្លួននឹងមិនចាកចេញពីអង្គការណាតូនោះឡើយ។ នេះបើតាមការចុះផ្សាយពីសារព័ត៌មាន AFP។
លោក Rubio បាននិយាយនៅក្នុងសន្និសីទសារព័ត៌មានមួយ មុនពេលកិច្ចប្រជុំជាមួយរដ្ឋមន្ត្រីការបរទេសនៃប្រទេសជាសមាជិកអង្គការណាតូ នៅប្រទេសប៊ែលហ្ស៊ិកថា ៖”ប្រធានាធិបតី លោក ដូណាល់ ត្រាំ បានបញ្ជាក់ពីជំហរយ៉ាងច្បាស់ថាលោក បន្តគាំទ្រណាតូជានិច្ច។ ហើយយើងនឹងបន្តស្ថិតនៅក្នុងអង្គការនេះ ដោយនឹងមិនចាកចេញទៅណាឡើយ។ ដូច្នេះហើយសូមប្រទេសជាសម្ព័ន្ធមិត្ត កុំមានការព្រួយបារម្ភអី”។
យ៉ាងណាមិញ ជុំវិញការបេ្តជ្ញាចិត្តរបស់សហរដ្ឋអាមេរិកនេះ ត្រូវបានធ្វើឡើង ចំពេលមានការសង្ស័យអំពីការប្តេជ្ញាចិត្តរបស់សហរដ្ឋអាមេរិកចំពោះអង្គការណាតូ ដោយសារតែប្រធានាធិបតីលោក ត្រាំ តែងតែប្រកាសគំរាមដកខ្លួនចេញជាច្រើនលើក ព្រោះតែប្រទេសសម្ព័ន្ធមិត្តមួយចំនួន មិនអាចចំណាយលើវិស័យការពារ តាមគោលដៅដែលចង់បាន។
ជម្រាបជូនថា បច្ចុប្បន្ន ណាតូ មានសមាជិកសរុបចំនួន ៣២ ប្រទេស ក្នុងនោះរួមមានសហរដ្ឋអាមេរិក កាណាដា និងប្រទេសនៅតំបន់អឺរ៉ុបចំនួន ៣០ ទៀត។ កាលពីដើមខែមករា លោក ត្រាំ បានអំពាវនាវឲ្យសមាជិកណាតូនីមួយៗ បង្កើនថវិកាការពារជាតិរបស់ខ្លួនឲ្យស្មើនឹង ៥% នៃផលិតផលក្នុងស្រុកសរុប ជាតួលេខដែលគ្មានប្រទេសសមាជិកណាមួយ អាចបំពេញបាននោះឡើយ រួមទាំងសហរដ្ឋអាមេរិកខ្លួនឯងផងដែរ៕
