ប្រធានាធិបតីអាមេរិក លោក ដូណាល់ ត្រាំ បាននិយាយថា មហាសេដ្ឋីកំពូលរបស់ពិភពលោក Elon Musk អាចនឹងចាកចេញពីមុខតំណែងនៅក្នុងជួរដ្ឋាភិបាលរបស់ខ្លួន នៅក្នុងពេលប៉ុន្មានខែខាងមុខនេះ បើទោះបីជាលោក ធ្លាប់បានទទូចថាមហាសេដ្ឋីរូបនេះ អាចបន្តកាន់តំណែង ដល់ពេលណាក៏បាន ក៏ដោយ។ នេះបើតាមការចុះផ្សាយពី AFP។
ប្រធានាធិបតីអាមេរិក លោក ត្រាំ បាននិយាយនៅលើយន្តហោះ Air Force One កាលពីថ្ងៃទី៣ ខែមេសា ដោយសំដៅទៅលើមហាសេដ្ឋី Elon Musk ថា ៖ “គាត់នឹងស្នាក់នៅមួយរយៈពេលទៀត បន្ទាប់មកនឹងត្រលប់ទៅកាន់កាប់អាជីវកម្មរបស់គាត់ពេញម៉ោងវិញ។ ហើយបច្ចុប្បន្ននេះ គាត់កំពុងធ្វើការងារដ៏អស្ចារ្យ” ។
យ៉ាងណាមិញ នៅពេលត្រូវបានសួរនាំដោយអ្នកសារព័ត៌មានថា តើលោក Musk អាចនឹងបន្តស្នាក់នៅក្នុងជួររដ្ឋាភិបាលបានរយៈពេលប៉ុន្មានទៀត ខណ:លោក ត្រាំ បានឆ្លើយតបវិញថា ៖”អាចចន្លោះពីពីរទៅបីខែទៀត”។ ប៉ុន្តែទន្ទឹមនឹងនេះ ប្រធានាធិបតីអាមេរិក ក៏បានបានទទូចថាមហាសេដ្ឋីកំពូលរូបនេះ នឹងនៅតែអាចស្នាក់នៅក្នុងរដ្ឋាភិបាល ដរាបណាដែលគាត់ចង់បាន។
មិនតែប៉ុណ្ណោះ លោក ត្រាំ បាននិយាយទៀតថា ៖”Elon Musk គឺជាមនុស្សដ៏អស្ចារ្យ និងជាមនុស្សដែលមានទេពកោសល្យ ប៉ុន្តែគាត់មានក្រុមហ៊ុនមួយចំនួនដែលត្រូវដំណើរការ។ ខ្ញុំចង់ឲ្យគាត់ស្នាក់នៅឲ្យបានយូរតាមដែលអាចធ្វើទៅបាន។ មូលហេតុទីមួយ ខ្ញុំចូលចិត្តគាត់។ ហើយទីពីរ គឺគាត់កំពុងធ្វើបានល្អណាស់ និងទីបី គាត់ជាអ្នកស្នេហាជាតិ” ។
ជម្រាបជូនផងដែរថា លោក Elon Musk បានដឹកនាំការិយាល័យប្រសិទ្ធភាពរដ្ឋាភិបាល (DOGE) ហើយបានក្លាយជាបុគ្គលិកពិសេសរបស់រដ្ឋាភិបាល បន្ទាប់ពីលោក ត្រាំ បានស្បថចូលកាន់តំណែងនៅថ្ងៃទី២០ ខែមករាមក។ សម្រាប់មុខតំណែងនេះផងដែរថា នឹងមិនទទួលបានប្រាក់ខែអ្វីនោះទេ ហើយនឹងធ្វើការមិនលើសពី ១៣០ថ្ងៃក្នុងមួយឆ្នាំឡើយ៕
