រដ្ឋមន្ត្រីក្រសួងរតនាគាអាមេរិក លោក Scott Bessent បានផ្តល់ដំបូន្មានដល់ប្រទេសនានា ដែលទទួលរងនូវការដាក់ពន្ធទៅវិញទៅមក (Reciprocal Tariff) ពីសហរដ្ឋអាមេរិក ឲ្យអង្គុយចុះវិញ ហើយកុំដាក់ពន្ធសងសឹក។ នេះបើតាមការចុះផ្សាយពីសារព័ត៌មាន Reuters។
រដ្ឋមន្ត្រីក្រសួងរតនាគារអាមេរិក លោក Bessent បានប្រាប់ទៅកាន់សារព័ត៌មាន FOX News កាលពីថ្ងៃទី២ ខែមេសាថា ៖”ដំបូន្មានរបស់ខ្ញុំចំពោះគ្រប់ប្រទេសទាំងអស់នៅពេលនេះ គឺកុំដាក់ពន្ធសងសឹក។ អង្គុយចុះវិញ ហើយសិក្សាវាដោយប្រុងប្រយ័ត្ន និងមើលពីរបៀបដែលវាដំណើរការ។ ពីព្រោះថាបើអ្នកសងសឹក នោះស្ថានការណ៍នឹងកាន់តែតឹងតែងឡើង”។
យ៉ាងណាមិញ ជុំវិញការកើឡើងរបស់លោក Bessent បែបនេះ បានកើតឡើង បន្ទាប់ពីប្រធានាធិបតី លោក ដូណាល់ ត្រាំ បានប្រកាសដាក់ចេញពន្ធថ្មីទ្រង់ទ្រាយធំបន្ថែមទៀត លើដៃគូពាណិជ្ជកម្មចំនួន ១៨០ ខណ:ក្នុងនោះប្រទេសប្រហែលពាក់កណ្តាល នឹងទទួលរងនូវពន្ធរួម ១០% ស្របពេលដៃគូពាណិជ្ជកម្មសំខាន់ៗរបស់សហរដ្ឋអាមេរិកមួយចំនួនទៀត នឹងទទួលរងនូវពន្ធគយខ្ពស់បំផុតរហូតដល់ ៥០% ចាប់ពីថ្ងៃទី៩ ខែមេសាតទៅ។
ជម្រាបជូនផងដែរថា កន្លងមក លោក Bessent បានប្រាប់សមាជិកព្រឹទ្ធសភាមកពីបក្សសាធារណរដ្ឋថា ពន្ធគយទៅមក នឹងក្លាយជារនាំងលើអ្វីដែលអាមេរិក នឹងដាក់លើប្រទេសនានា ប៉ុន្តែកម្រិតនេះ អាចត្រូវបានកាត់បន្ថយវិញ ប្រសិនបើដៃគូពាណិជ្ជកម្មបំពេញតាមការទាមទាររបស់រដ្ឋបាល ត្រាំ នោះ៕
