ក្រសួងការបរទេសវៀតណាម នៅថ្ងៃសុក្រនេះ បាននិយាយថា ខ្លួនមានការសោកស្តាយចំពោះការសម្រេចចិត្តរបស់សហរដ្ឋអាមេរិក ក្នុងការដំឡើងពន្ធទៅវិញទៅមក (Reciprocal Tariff) ជាមួយកម្រិតដ៏ខ្ពស់បំផុតមួយ លើការនាំចេញទំនិញរបស់ខ្លួន។ នេះបើតាមការចុះផ្សាយពីសារព័ត៌មាន CNA។
អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាននិយាយនៅថ្ងៃនេះថា ៖”វៀតណាមមានការសោកស្តាយខ្លាំង ចំពោះការប្រកាសរបស់សហរដ្ឋអាមេរិក លើការសម្រេចចិត្តដំឡើងពន្ធទៅវិញទៅមក លើការនាំចេញរបស់វៀតណាម ទៅកាន់សហរដ្ឋអាមេរិក”។
លោកស្រី Hang បានបន្ថែមថា ៖”យើងជឿជាក់ថាការសម្រេចចិត្តខាងលើ មិនស្របនឹងការពិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មដែលផ្តល់ផលប្រយោជន៍ទៅវិញទៅមករវាងប្រទេសទាំងពីរឡើយ ហើយវាក៏មិនបានឆ្លុះបញ្ចាំងពីស្មារតីនៃភាពជាដៃគូយុទ្ធសាស្ត្រគ្រប់ជ្រុងជ្រោយ សម្រាប់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍ ហើយនឹងជះឥទ្ធិពលអវិជ្ជមានដល់ទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ក៏ដូចជាផលប្រយោជន៍ប្រជាជន និងធុរកិច្ចនៃប្រទេសទាំងពីរ ប្រសិនបើពន្ធគយនេះបន្តអនុវត្តនោះ”។
ប៉ុន្តែទោះជាយ៉ាងណាក៏អ្នកនាំពាក្យក្រសួងការបរទេសវៀតណាមរូបនេះ បាននិយាយថា ប្រទេសរបស់ខ្លួន នឹងបន្តស្វែងរកដំណោះស្រាយសម្រាប់ការអភិវឌ្ឍ ស្ថិរភាព និងនិរន្តរភាពនៃទំនាក់ទំនងសេដ្ឋកិច្ចទ្វេភាគី ជាមួយសហរដ្ឋអាមេរិក។
គួរឲ្យដឹងថា ប្រធានាធិបតីអាមេរិកលោក ដូណាល់ ត្រាំ បានប្រកាសកាលពីថ្ងៃទី២ ខែមេសាថា លោកនឹងដាក់ពន្ធនាំចូលលើដៃគូពាណិជ្ជកម្មជាង ១៨០។ ហើយប្រហែលពាក់កណ្តាលនៃប្រទេសទាំងនោះនឹងត្រូវដាក់ពន្ធរួម ១០% ចាប់ពីថ្ងៃទី៥ ខែមេសា ខណ:ដៃគូពាណិជ្ជកម្មសំខាន់ៗរបស់សហរដ្ឋអាមេរិកមួយចំនួនផ្សេងទៀត នឹងទទួលរងនូវពន្ធគយខ្ពស់រហូតដល់ ៥០% ចាប់ពីថ្ងៃទី៩ ខែមេសា។
ជម្រាបជូនផងដែរថា ប្រទេសវៀតណាម ស្ថិតក្នុងចំណោមប្រទេសដែលជាប់អត្រាពន្ធគយខ្ពស់បំផុតមួយ រហូតដល់ទៅ ៤៦% រួមជាមួយប្រទេសចិន កម្ពុជា ឥណ្ឌូណេស៊ី ឡាវ និងមីយ៉ាន់ម៉ា ជាដើម៕
