ប្រទេសកាណាដា កាលពីពេលថ្មីៗនេះ បានធ្វើការឆ្លើយតបទៅនឹងផែនការពន្ធនាំចូល ២៥% របស់សហរដ្ឋអាមេរិកលើរថយន្ត ជាមួយនឹងការដាក់ចេញវិធានការពន្ធគយស្រដៀងគ្នានេះវិញ ដែលនឹងធ្វើឲ្យប៉ះពាល់ដល់ទំនិញមានតម្លៃសរុបប្រមាណ ២៥ពាន់លានដុល្លារ។ នេះបើតាមការចុះផ្សាយពីសារព័ត៌មាន Reuters។
នាយករដ្ឋមន្ត្រីកាណាដា លោក Mark Carney បានប្រកាសថា ប្រទេសរបស់លោក នឹងដាក់ពន្ធ ២៥% លើរថយន្តទាំងអស់ដែលនាំចូលពីសហរដ្ឋអាមេរិក ដែលគ្មានសិទ្ធិទទួលបានការអនុគ្រោះក្រោមកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា (USMCA) នោះឡើយ។ ហើយតម្លៃនៃទំនិញអាមេរិកដែលរងផលប៉ះពាល់ពីផែនការពន្ធគយថ្មីរបស់កាណាដានេះ អាចមានចំនួនប្រហែល ៣៥,៦ពាន់លានដុល្លារកាណាដា (២៥,៣ពាន់លានដុល្លារ) ។
យ៉ាងណាមិញ នៅក្នុងអំឡុងសន្និសីទសារព័ត៌មានកាលពីថ្ងៃទី៣ ខែមេសាកន្លងទៅនេះ លោក Carney បានបញ្ជាក់សារជាថ្មីថា ពន្ធគយថ្មីនេះ នឹងមិនត្រូវបានអនុវត្តចំពោះគ្រឿងបន្លាស់ និងយានយន្តដែលមានដើមកំណើតម៉ិកស៊ិកនោះទេ។ហើយចំពោះពន្ធគយពីមុនដែលប្រកាសដោយកាណាដា លើសហរដ្ឋអាមេរិក នឹងនៅតែបន្តអនុវត្តដូចដើម។
គួរឲ្យដឹងថា សហរដ្ឋអាមេរិកបានដាក់ពន្ធនាំចូល ២៥% រួចហើយលើរថយន្ត និងរថយន្តធុនស្រាលទាំងអស់ដែលនាំចូលមកក្នុងប្រទេសរបស់ខ្លួន ខណ:ពន្ធគយថ្មីនេះ ត្រូវបានគេរំពឹងថានឹងធ្វើឲ្យខូចខាតយ៉ាងធ្ងន់ធ្ងរដល់ឧស្សាហកម្មរថយន្ត នៅអាមេរិកខាងជើង។
ជម្រាបជូនថា នៅក្នុងឆ្នាំ២០២៤ សហរដ្ឋអាមេរិក បាននាំចូលផលិតផលដែលទាក់ទងនឹងរថយន្តមានតម្លៃសរុប ៤៧៤ពាន់លានដុល្លារ រួមទាំងរថយន្តដឹកអ្នកដំណើរដែលមានតម្លៃ ២២០ពាន់លានដុល្លារ។ ម៉ិកស៊ិក ជប៉ុន កូរ៉េខាងត្បូង កាណាដា និងអាឡឺម៉ង់ ដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក គឺជាអ្នកផ្គត់ផ្គង់ដ៏សំខាន់ដល់ប្រទេសនេះ៕
