មនុស្សរាប់រយនាក់ បានធ្វើការតវ៉ានៅក្នុងទីក្រុងនានា នៅតំបន់អឺរ៉ុប កាលពីថ្ងៃសៅរ៍កន្លងទៅ ដើម្បីប្រឆាំងទៅនឹងគោលនយោបាយរបស់ប្រធានាធិបតីអាមរិក លោក ដូណាល់ ត្រាំ ក៏ដូចជាតវ៉ាទៅនឹងទីប្រឹក្សាជំនិតរបស់លោក គឺមហាសេដ្ឋីកំពូលរបស់ពិភពលោក Elon Musk ផងដែរ បន្ទាប់ពីទីផ្សារហិរញ្ញវត្ថុអន្តរជាតិ ធ្លាក់ចុះយ៉ាងគំហុក បន្ទាប់ពីការដាក់ចេញពន្ធគយថ្មីដ៏ចម្រូងចម្រាស់របស់លោក ត្រំា។ នេះបើតាមការចុះផ្សាយពីសារព័ត៌មាន Reuters។
នៅក្នុងទីក្រុង Frankfurt ប្រទេសអាល្លឺម៉ង់ បាតុកររាប់រយនាក់ បានចាប់ផ្តើមប្រមូលផ្តុំគ្នាងើបតវ៉ាប្រឆាំងទៅនឹងគោលនយោបាយរបស់លោក ត្រាំ ខណ:កម្មភាពទាំងនេះ ត្រូវបានរៀបចំឡើងដោយ Democrats Abroad ដែលជាអង្គការផ្លូវការរបស់គណបក្សប្រជាធិបតេយ្យ សម្រាប់ពលរដ្ឋអាមេរិកដែលរស់នៅក្រៅប្រទេស។
ជាមួយគ្នានេះ នៅឯទីក្រុងប៊ែរឡាំង ប្រទេសអាល្លឺម៉ង់ដូចគ្នានោះ ការតវ៉ាទ្រង់ទ្រាយធំមួយ ក៏ត្រូវបានធ្វើឡើងនៅមុខបន្ទប់តាំងបង្ហាញរថយន្ត Tesla របស់មហាសេដ្ឋី Elon Musk ផងដែរ ដោយបាតុករទាំងនោះ បានកាន់បដាអំពាវនាវឲ្យបងប្អូនជនជាតិអាមេរិកដែលរស់នៅក្នុងប្រទេសអាឡឺម៉ង់ទាំងអស់ ចូលរួមងើបប្រឆាំងតវ៉ាទាមទារឲ្យមានការបញ្ចប់ភាពវឹកវរ នៅក្នុងទឹកដីសហរដ្ឋអាមេរិក។
ដោយឡែកនៅរដ្ឋធានីប៉ារីស មនុស្សប្រហែល ២០០នាក់ ដែលភាគច្រើនជាជនជាតិអាមេរិករស់នៅទីនោះ បានប្រមូលផ្តុំគ្នានៅមុខ Place de la République ដើម្បីតវ៉ាប្រឆាំងនឹងគោលនយោបាយរបស់ ត្រាំ ផងដែរ។ ដោយអ្នកខ្លះថែមទាំងបាន ទាមទារឲ្យប្រធានាធិបតីសហរដ្ឋអាមេរិករូបនេះ លាលែងពីតំណែង ថែមទៀតផង។
មិនតែប៉ុណ្ណោះ ការតវ៉ាប្រឆាំងនឹងលោក ត្រាំ ក៏ដូចជាមហាសេដ្ឋី Elon Musk ក៏ត្រូវបានធ្វើឡើង នៅក្នុងទីក្រុងរបស់ប្រទេសក្នុងតំបន់អឺរ៉ុបផ្សេងទៀត រួមទាំងទីក្រុងឡុងដ៍ ចក្រភពអង់គ្លេស និងលីសបោន ប្រទសព័រទុយហ្គាល់ ផងដែរ។
ជម្រាបជូនផងដែរថា ជុំវិញការតវ៉ានេះ ត្រូវបានកើតឡើងបន្ទាប់ពីរដ្ឋបាលរបស់លោក ត្រាំ បានជំរុញយុទ្ធនាការមួយ ដើម្បីសម្រួលដល់រដ្ឋាភិបាល ដោយចាប់ផ្តើមដំឡើងពន្ធលើដៃគូពាណិជ្ជកម្មជាង ១៨០ ដែលបណ្តាលឲ្យទីផ្សារភាគហ៊ុនធ្លាក់ចុះយ៉ាងគំហុក ហើយថែមទាំងបានធ្វើប្រជាជនអាមេរិក ជាច្រើនមានការមិនសប្បាយចិត្តខ្លាំងផងដែរ៕
