លោក Jamie Dimon , Bill Ackman រួមជាមួយមហាសេដ្ឋីលំដាប់កំពូលៗរបស់សហរដ្ឋអាមេរិកជាច្រើនទៀត កំពុងអំពាវនាវឲ្យមានការពន្យារពេល ៩០ថ្ងៃសិន ជុំវិញការដាក់ចេញគោលនយោបាយពន្ធគយទៅវិញទៅមក (Reciprocal Tariff) របស់ប្រធានាធិបតី លោក ដូណាល់ ត្រាំ។ នេះបើតាមការចុះផ្សាយពីសារព័ត៌មាន CNN។
មហាសេដ្ឋីទាំងនោះ បានព្រមានថា គោលនយោបាយបង់ពន្ធទៅវិញទៅមក របស់ប្រធានាធិបតី លោក ត្រាំ នឹងជំរុញឲ្យសេដ្ឋកិច្ចពិភពលោកធ្លាក់ចូលទៅក្នុងវិបត្តិ និងអាចធ្វើឲ្យខូចជំហររបស់សហរដ្ឋអាមេរិក ក្នុងជានាមមហាអំណាចសេដ្ឋកិច្ចរបស់ពិភពលោកផងដែរ។
យ៉ាងណាមិញ ដោយបន្ថែមពីលើនោះ ក្រុមមហាសេដ្ឋីលំដាប់កំពូលៗទាំងនោះ ក៏បានអំពាវនាវឲ្យរដ្ឋបាលរបស់លោក ត្រំា ធ្វើសកម្មភាពឲ្យបានឆាប់រហ័ស ស្របពេលដែលទីផ្សារភាគហ៊ុនកំពុងធ្លាក់ចុះយ៉ាងគំហុក ដោយសារតែគោលនយោបាយពន្ធគយថ្មីចុងក្រោយនេះ។
ទន្ទឹងមនេះ មហាសេដ្ឋី Bill Ackman ដែលជាស្ថាបនិកមូលនិធិការពារហានិភ័យ Pershing Square បានស្នើឲ្យមានការពន្យារពេល ៩០ថ្ងៃ ទៅលើវិធានការពន្ធគយទ្រង់ទ្រាយធំចុងក្រោយនេះ។ មិនតែប៉ុណ្ណោះ លោកក៏បានជំរុញឲ្យប្រធានាធិបតី លោក ត្រាំ ធ្វើការចរចាឡើងវិញ ទៅលើកិច្ចព្រមព្រៀងពន្ធមិនយុត្តិធម៌មួយចំនួន ផងដែរ។
គួរឲ្យដឹងផងដែរថា លោក Ackman ដែលជាពាណិជ្ជករ និងធ្លាក់ជាអ្នកគាំទ្រស្មោះស្ម័គ្ររបស់លោក ត្រាំ នោះ ឥឡូវនេះបានងាកមកធ្វើការរិះគន់ជាសាធារណៈទៅលើវិធានការពន្ធទៅវិញទៅមក ដែលអាចបណ្តាលឲ្យអាជីវកម្មប្រឈមមុខនឹងការលំបាក និងអ្នកប្រើប្រាស់ក្នុងស្រុកកាន់តែរឹតត្បិតការចំណាយរបស់ពួកគេ។
ដោយឡែក មហាសេដ្ឋី Richard Branson ស្ថាបនិកក្រុមហ៊ុន Virgin Group ក៏បានសរសេរនៅលើបណ្តាញសង្គម X ថា ៖”ពន្ធគយរបស់រដ្ឋាភិបាលអាមេរិក កំពុងធ្វើឲ្យសេដ្ឋកិច្ចពិភពលោកស្ថិតក្នុងទិសដៅដ៏គ្រោះថ្នាក់”។ លោកក៏ថែមទាំងបានអំពាវនាវឲ្យរដ្ឋបាលរបស់លោក ត្រាំ ទទួលស្គាល់នូវកំហុសរបស់ខ្លួន ផងដែរ។
ដោយបានធ្វើការរិះគន់ទៅលើគោលនយោបាយពន្ធដារទៅវិញទៅមកនេះ លោក Jamie Dimon នាយកប្រតិបត្តិក្រុមហ៊ុន JPMorgan ក៏បានព្រមានអំពីហានិភ័យនៃការកើនឡើងតម្លៃទំនិញប្រើប្រាស់ ដែលជំរុញឲ្យសេដ្ឋកិច្ចពិភពលោកធ្លាក់ចូលក្នុងវិបត្តិសេដ្ឋកិច្ច និងធ្វើឲ្យជំហររបស់អាមេរិក នៅក្នុងពិភពលោកកាន់តែចុះខ្សោយ។
ជម្រាបជូនផងដែរថា ទីផ្សារភាគហ៊ុនអាមេរិក បានបន្តធ្លាក់ចុះយ៉ាងគំហុកនៅក្នុងការជួញដូរចុងក្រោយ នៅថ្ងៃទី៧ ខែមេសា ដោយក្នុងនោះទីផ្សារហ៊ុន S&P 500 បានធ្លាក់ចុះអស់ប្រមាណ ១៣% ។ ហើយនេះក៏ជាលើកទីមួយផងដែរ ដែលទីផ្សារហ៊ុនរបស់អាមេរិក មានការរង្គោះរង្គើខ្លាំង គិតចាប់តាំងពីមានវិបត្តិហិរញ្ញវត្ថុក្នុងឆ្នាំ២០០៨ មក៕
