ប្រធានាធិបតីលោក ដូណាល់ ត្រាំ បាននិយាយថា លោកហាក់ដូចជាមិនសូវត្រូវការលោក Elon Musk ឲ្យនៅក្នុងជួររដ្ឋបាលរបស់លោកប៉ុន្មាននោះទេ ប៉ុន្តែបានបញ្ជាក់ថាលោក ស្រលាញ់ចូលចិត្តមហាសេដ្ឋីរូបនេះខ្លាំងណាស់។ នេះបើតាមការចុះផ្សាយពីសារព័ត៌មាន Business Insider។
លោក ត្រាំ បាននិយាយក្នុងអំឡុងពេលកិច្ចប្រជុំគណៈរដ្ឋមន្ត្រី នៅសេតវិមាន កាលពីថ្ងៃទី១០ ខែមេសាថា ៖”Elon Musk បានធ្វើការងារដ៏អស្ចារ្យមួយ។ មើលចុះ គាត់កំពុងអង្គុយនៅទីនេះ ហើយនោះមិនមែនជាអ្វីដែលខ្ញុំចាប់អារម្មណ៍នោះទេ។ ខ្ញុំហាក់ដូចជាមិនសូវត្រូវការ Elon Musk សម្រាប់ហេតុផលណាមួយ ក្រៅតែពីខ្ញុំស្រលាញ់ចូលចិត្តគាត់នោះឡើយ” ។
បន្ថែមពីនេះ លោក ត្រាំ ក៏បាននិយាយដល់រឿងទិញរថយន្តរបស់ក្រុមហ៊ុន Tesla ដើម្បីជាការបង្ហាញពីការគាំទ្រដល់មហាសេដ្ឋី លោក Musk បើទោះបីជាលោកមិនត្រូវការជិះរថយន្តដោយខ្លួនឯកផ្ទាល់ និងមិនត្រូវការការបញ្ចុះតម្លៃក៏ដោយ។
មិនតែប៉ុណ្ណោះ ប្រធានាធិបតីអាមេរិករូបនេះ បានបន្តអះអាងថា Elon Musk បានធ្វើការងារដ៏អស្ចារ្យ ប៉ុន្តែត្រូវបានគេគេមើលរំលង។ មហាសេដ្ឋីអាមេរិករូបនេះ ត្រូវបានតែងតាំងដោយលោក ត្រាំ ជាបុគ្គលិករដ្ឋាភិបាលពិសេស និងបានទទួលបន្ទុកដឹកនាំការិយាល័យប្រសិទ្ធភាពរដ្ឋាភិបាល (DOGE) ក្នុងកិច្ចការកែទម្រង់ និងសម្រួលប្រព័ន្ធរបស់រដ្ឋាភិបាល។
ជម្រាបជូនថា DOGE គ្រោងនឹងដំណើរការរហូតដល់ថ្ងៃទី៤ ខែកក្កដា ឆ្នាំ២០២៦ ប៉ុន្តែទោះយ៉ាងណាក៏ដោយ មានសញ្ញាថាអង្គភាពនេះហាក់ជិតផុតអាណត្តិហើយ ស្របពេលលោក ត្រាំក៏បានបញ្ជាក់ផងដែរថា លោក Musk និងត្រូវចាកចេញពីតំណែងជាប្រធានអង្គភាពនេះ ក្នុងពេលឆាប់ៗខាងមុខ ដោយបុគ្គលិក DOGE ក៏នឹងត្រូវបានផ្ទេរទៅកាន់ទីភ្នាក់ងារសហព័ន្ធផ្សេងៗ ទៀតផងដែរ៕
