យោងតាមប្រធានក្រុមហ៊ុន VinFast បានបង្ហាញនិយាយនៅថ្ងៃព្រហស្បតិ៍នេះថា ក្រុមហ៊ុនផលិតរថយន្តអគ្គិសនីលំដាប់កំពូលរបស់វៀតណាម គ្រោងនឹងបើកដំណើរការរោងចក្រដំឡើងរថយន្តរបស់ខ្លួន នៅក្នុងប្រទេសឥណ្ឌា នៅខែមិថុនា និងមួយទៀត នៅក្នុងប្រទេសឥណ្ឌូណេស៊ី នៅក្នុងខែតុលាខាងមុខ ដើម្បីព្យាយាមបង្កើនចំណែកទីផ្សារនៅក្នុងតំបន់អាស៊ីបន្ថែមទៀត។ នេះបើតាមការចុះផ្សាយពីសារព័ត៌មាន CNA។
ដំបូងឡើងក្រុមហ៊ុន VinFast មានគម្រោងផ្តោតសំខាន់តែលើទីផ្សារអាមេរិក សម្រាប់ការលក់រថយន្តអគ្គិសនីនៅក្រៅប្រទេសរបស់ខ្លួន ប៉ុន្តែដោយសារតែមានការវិវឌ្ឍន៍យឺតយ៉ាវ នៅក្នុងទឹកដីសហរដ្ឋអាមេរិក និងសូម្បីតែមុនពេលមានការកើនឡើងនៃភាពមិនច្បាស់លាស់ដែលបណ្តាលមកពីវិធានការពន្ធគយរបស់លោក ដូណាល់ ត្រាំ ផងដែរនោះ បានជំរុញឲ្យក្រុមហ៊ុនផ្លាស់ប្តូរយុទ្ធសាស្រ្តរបស់ខ្លួនយ៉ាងឆាប់រហ័សវិញ។
មហាសេដ្ឋីមានដាច់គេបំផុតរបស់វៀតណាម លោក Pham Nhat Vuong បានប្រាប់ទៅកាន់ម្ចាស់ភាគហ៊ុន VinGroup ដែលជាក្រុមហ៊ុនមេរបស់ VinFast ថា៖” ក្នុងពេលអនាគតដ៏ខ្លីខាងមុខនេះ ក្រៅពីទីផ្សារវៀតណាម យើងនឹងផ្តោតលើទីផ្សារឥណ្ឌូណេស៊ី ឥណ្ឌា និងហ្វីលីពីនបន្ថែមទៀត”។
លោក Pham Nhat Vuong បានបន្ថែមទៀតថា នៅពេលនេះ VinFast មិនមានគម្រោងជំរុញការលក់នៅសហរដ្ឋអាមេរិក កាណាដា និងសហភាពអឺរ៉ុបនោះទេ ដោយសារថ្លៃដឹកជញ្ជូនខ្ពស់ពេក។
គួរឲ្យដឹងថាកាលពីឆ្នាំមុន VinFast និងរដ្ឋ Tamil Nadu ភាគខាងត្បូងប្រទេសឥណ្ឌា បានយល់ព្រមធ្វើការឆ្ពោះទៅរកការវិនិយោគរហូតដល់ ២ពាន់លានដុល្លារ ជាមួយនឹងការប្តេជ្ញាចិត្តចំនួន ៥០០លានដុល្លារបន្ថែមទៀតសម្រាប់រយៈពេល ៥ឆ្នាំដំបូងនៃគម្រោងសាងសង់រោងចក្រថ្មីមួយដែលមានសមត្ថភាពផលិតរថយន្តប្រចាំឆ្នាំរហូតដល់ ១៥០ ០០០ គ្រឿង។
មិនតែប៉ុណ្ណោះ កាលពីខែកក្កដាឆ្នាំមុន VinFast ក៏បានបើកការដ្ឋានសាងសង់រោងចក្រដំឡើងរថយន្តថ្មីមួយនៅឥណ្ឌូណេស៊ីផងដែរ ខណ:លោក Vuong នៅថ្ងៃព្រហស្បតិ៍នេះ បានបញ្ជាក់យ៉ាងច្បាស់ថាវានឹងបើកដំណើរការនៅក្នុងខែតុលា ខាងមុខ៕
