ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ បានបង្ហាញការរិះគន់ធ្ងន់ៗចំពោះរុស្ស៊ី ជុំវិញការវាយប្រហារជាបន្តបន្ទាប់ក្នុងរយ:ពេលប៉ុន្មានថ្ងៃៗនេះ ដោយបានលើកឡើងថា លោក វ៉្លាឌីមៀ ពូទីន ប្រហែលជាមិនចង់បញ្ចប់ជម្លោះជាមួយអ៊ុយក្រែននោះឡើយ។ នេះបើតាមការចុះផ្សាយពីសារព័ត៌មាន AFP។
នៅក្នុងការបង្ហោះសារមួយនៅលើបណ្តាញសង្គម Truth បន្ទាប់ពីមានការជួបពិភាក្សាគ្នា កាលពីថ្ងៃទី២៦ ខែមេសា ជាមួយប្រធានាធិបតីអ៊ុយក្រែន លោក Volodymyr Zelensky ក្នុងអំឡុងចូលរួមពិធីបុណ្យសពរបស់សម្តេច Pope Francis នៅបុរី Vatican ប្រធានាធិបតីអាមេរិក លោក ត្រាំ បាននិយាយថា ៖”ប្រហែលជាយើងត្រូវប្រព្រឹត្តចំពោះប្រទេសរុស្ស៊ីតាមរបៀបផ្សេងទៀត ហើយអ្វីដែលអាចធ្វើបានគឺការដាក់ទណ្ឌកម្មលើប្រទេសនេះបន្ថែមទៀត”។
លោក ត្រាំ បានសរសេរទៀតថា ៖” វាគ្មានហេតុផលសម្រាប់លោក ពូទីន ក្នុងការបាញ់មីស៊ីល ទៅតាមទីក្រុង ទីប្រជុំជន និងតំបន់ស៊ីវិល ក្នុងប្រទេសអ៊ុយក្រែន ក្នុងរយ:ពេលប៉ុន្មានថ្ងៃកន្លងមកនេះនោះទេ។ វាធ្វើឲ្យខ្ញុំត្រូវគិតឡើងវិញថា ប្រហែលជាគាត់មិនចង់បញ្ឈប់ការប្រយុទ្ធគ្នានោះទេ ប៉ុន្តែគាត់កំពុងប្រើប្រាស់ខ្ញុំទៅវិញ។ មនុស្សច្រើនណាស់កំពុងស្លាប់ជាបន្តបន្ទាប់”។
យ៉ាងណាមិញ ជុំវិញសេចក្តីថ្លែងការណ៍នេះ ត្រូវបានធ្វើឡើងដោយលោក ត្រាំ បន្ទាប់ពីមានកិច្ចប្រជុំរយៈពេល ១៥នាទី ជាមួយលោក Zelensky នៅបុរី Vatican មុនពេលពិធីបុណ្យសពរបស់សម្តេច Pope Francis ។ ភាគីទាំងពីរបានពណ៌នាថាជំនួបនេះមានផលិតភាព និងស្ថាបនា ប៉ុន្តែមិនបានផ្តល់ព័ត៌មានលម្អិតបន្ថែមទៀតនោះទេ។
ជម្រាបជូនថា នៅថ្ងៃដដែលនោះ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រធានាធិបតីលោក ពូទីណ បានរំលឹកឡើងវិញទៅកាន់លោក Stephen Witkoff បេសកជនពិសេសរបស់លោក ត្រាំ ថា រុស្ស៊ីបានត្រៀមខ្លួនរួចជាស្រេចហើយ ក្នុងការបន្តការចរចាជាមួយអ៊ុយក្រែន ដោយគ្មានលក្ខខណ្ឌជាមុន៕
