ប្រធានាធិបតីអាមេរិក លោក ដូណាល់ ត្រាំ បាននិយាយថា កិច្ចពិភាក្សាស្តីពីពន្ធគយនាំចូលជាមួយប្រទេសឥណ្ឌា គឺដំណើរការទៅបានយ៉ាងរលូន។ នេះបើតាមការចុះផ្សាយពីសារព័ត៌មាន CNBC។
ថ្លែងប្រាប់ទៅកាន់អ្នកយកព័ត៌មាននៅខាងក្រៅសេតវិមាន កាលពីថ្ងៃទី២៩ ខែមេសា លោក ត្រាំ បាននិយាយថា ៖”ខ្ញុំគិតថាយើងនឹងអាចធ្វើកិច្ចព្រមព្រៀងជាមួយប្រទេសឥណ្ឌា ក្នុងពេលឆាប់ៗ។ នាយករដ្ឋមន្ត្រីឥណ្ឌា បានមកកាន់ទីនេះកាលពីបីសប្តាហ៍មុន។ ពួកគេចង់ធ្វើកិច្ចព្រមព្រៀងជាមួយយើងណាស់”។
គួរឲ្យដឹងផងដែរថា ជុំវិញការលើកឡើងរបស់លោក ត្រាំ បែបនេះ ត្រូវបានធ្វើឡើង បន្ទាប់ពីលោក Scott Bessent រដ្ឋមន្ត្រីក្រសួងរតនាគារសហរដ្ឋអាមេរិក បាននិយាយថា សហរដ្ឋអាមេរិក គឺជាកំពុងខិតជិតខ្លាំងណាស់ ក្នុងការបញ្ចប់កិច្ចព្រមព្រៀងពន្ធគយជាមួយប្រទេសឥណ្ឌា ខណ:ពេលដែលអនុប្រធានាធិបតី លោក JD Vance បានជួបជាមួយនាយករដ្ឋមន្ត្រីឥណ្ឌា លោក Modi កាលពីសប្តាហ៍មុន។
លោក Bessent បាននិយាយទៀតថា “មេដឹកនាំប្រទេសទាំងពីរកំពុងមានការពិភាក្សារីកចម្រើនយ៉ាងខ្លាំង។ ខ្ញុំនឹងមានការប្រកាសអំពីលទ្ធផលនៃកិច្ចព្រមព្រៀងពន្ធគយរបស់ប្រទេសឥណ្ឌាក្នុងពេលឆាប់ៗនេះ”។ ប៉ុន្តែទោះជាយ៉ាងណាក៏ដោយ លោក Bessent ហាក់មិនបានផ្តល់ពេលវេលាជាក់លាក់ណាមួយ ជុំវិញការបញ្ចប់កិច្ចព្រមព្រៀងនេះនៅឡើយទេ។
សេតវិមានកំពុងព្យាយាមចរចារកិច្ចព្រមព្រៀងជាមួយដៃគូពាណិជ្ជកម្មធំៗរបស់ខ្លួន ពោលគឺនៅប៉ុន្មានសប្តាហ៍ បន្ទាប់ពីប្រធានាធិបតីលោក ត្រាំ បានប្រកាសអំពីពន្ធគយថ្មីមួយចំនួន។
លោក Bessent បានបន្ថែមទៀតថា ៖”យើងមានទំនាក់ទំនងជាមួយដៃគូពាណិជ្ជកម្មសំខាន់ៗចំនួន ១៧ រួចមកហើយ ។ យើងនឹងព្យាយាមនិយាយជាមួយពួកគេទាំងអស់ ឬយ៉ាងហោចណាស់ទាំង ១៧ ក្នុងចំណោមពួកគេក្នុងរយៈពេលពីរបីសប្តាហ៍ខាងមុខនេះ។ ពួកគេភាគច្រើនបានមកដល់ទីក្រុងវ៉ាស៊ីនតោន”។
ជម្រាបជូនថា កាលពីសប្តាហ៍មុន មន្ត្រីអង់គ្លេស និងសិង្ហបុរីបាននិយាយថា ការចរចាពន្ធជាមួយអាមេរិកមិនទាន់អាចឈានដល់ការសន្និដ្ឋាននៅឡើយទេ ហើយការពិភាក្សានឹងត្រូវបន្តធ្វើឡើងនៅពេលខាងមុខទៀត៕
