ប្រទេសជប៉ុនគឺជាប្រទេសសេដ្ឋកិច្ចជឿនលឿនបំផុតមួយនៅទ្វីបអាស៊ី ក៏ដូចជានៅសកលលោកផងដែរ ដ្បិតកន្លងទៅប្រទេសមួយនេះថែមទាំងជាប់ឈ្មោះជាប្រទេសមានសុវត្ថិភាពបំផុតមួយលើលោកថែមទៀត។
មិនត្រឹមតែប៉ុណ្ណោះ ជប៉ុនក៏មាននូវមហាសេដ្ឋីប្រាក់ពាន់លានដុល្លារជាច្រើនរូបផងដែរ។ តែបើតាមបញ្ជីឈ្មោះបុគ្គលមានបំផុតនៅប្រទេសជប៉ុន មិនជាប់ឈ្មោះស្ថាបនិកឬខ្សែស្រឡាយគ្រួសារស្ថាបនិកក្រុមហ៊ុនផលិតរថយន្តធំៗណាមួយនោះទេ។ អត្ថបទមួយនេះ ឧកញ៉ាញូវសន៍សូមណែនាំបុគ្គលមានទ្រព្យច្រើនបំផុត ៩ រូបប្រចាំប្រទេសនៅទឹកដីដែលមានរហ័សនាម“ទឹកដីនៃព្រះអាទិត្យរះ” ឬ“ទឹកដីនៃផ្កាសាគូរ៉ា”នេះ៖
1/Masayoshi Son មានទ្រព្យសម្បត្តិ ៤៤,៤ ពាន់លានដុល្លារ
លោកគឺជាស្ថាបនិកក្រុមហ៊ុនទូរគមនាគមន៍ និងធនាគារយក្ស SoftBank Group ប្រចាំជប៉ុន ខណៈក្រុមហ៊ុនវិនិយោគ Vision Fund របស់លោកបានបណ្ដាក់ទុនច្រើនជាង ១០០ ក្រុមហ៊ុនទូទាំងពិភពលោកដែលមានដូចជា Apple, Qualcomm និង Grab ជាដើម។
2/Tadashi Yanai មានទ្រព្យសម្បត្តិ ៤២ ពាន់លានដុល្លារ
បុគ្គលមានបំផុតទី ២ នៅជប៉ុនគឺជាស្ថាបនិកក្រុមហ៊ុនលក់សម្លៀកបំពាក់ដ៏ល្បីឈ្មោះទូទាំងពិភពលោក Uniqlo។ លោកក៏មានក្រុមហ៊ុនច្រើនទៀតក្នុងដៃដូចជា Theroy, Helmun Lang, J Brand និង GU ជាដើម។
3/Takemistu Takizaki មានទ្រព្យសម្បត្តិ ២៥,៨ ពាន់លានដុល្លារ
ជាស្ថាបនិកក្រុមហ៊ុន Keyence ដែលជាអ្នកផ្គត់ផ្គង់គ្រឿងបច្ចេកវិទ្យាទាក់ទងនឹងការប្រព័ន្ធបញ្ជា និងស្កេននៃក្រុមហ៊ុនផ្សេងៗ។ ទោះចុះចេញពីតំណែងជាប្រធានក្រុមហ៊ុនកាលពីឆ្នាំ ២០១៥ ក្ដី តែបុរសវ័យ ៧៦ ឆ្នាំនៅបន្តគ្រប់គ្រងតំណែងជាន់ខ្ពស់មួយនៅក្រុមហ៊ុនដដែល។
4/Nobutada Saji និងគ្រួសារ មានទ្រព្យសម្បត្តិ ៩,៧ ពាន់លានដុល្លារ
លោក Nobutada គឺជាប្រធានក្រុមហ៊ុនផលិតភេសជ្ជៈដ៏ចំណាស់មួយនៅប្រទេសជប៉ុន ដែលមានឈ្មោះថាSuntory Holdings និងត្រូវបានបង្កើតឡើងដោយជីតាទួតរបស់លោកក្នុងឆ្នាំ ១៨៩៩។
5/Shigenobu Nagamori មានទ្រព្យសម្បត្តិ ៩ ពាន់លានដុល្លារ
ជាស្ថាបនិក និងជាប្រធានដោយផ្ទាល់នៅក្រុមហ៊ុន Nidec ដែលជាក្រុមហ៊ុនផលិតម៉ូទ័រធំបំផុតលើលោក ដែលអាចរកឃើញស្ទើរគ្រប់គ្រឿងចក្រទាំងអស់។
6/Takashisa Takahara មានទ្រព្យសម្បត្តិ ៨ ពាន់លានដុល្លារ
រាងប្លែកពីអ្នកមុនៗបន្តិច ដោយលោក Takashisa ជាប្រធានក្រុមហ៊ុនផលិតខោទឹកនោម Unicharm ដែលបង្កើតឡើងដោយឪពុករបស់លោក Keiichiro នៅឆ្នាំ ១៩៦១។ ក្រុមហ៊ុនមួយនេះបាននាំចេញខោទឹកនោមជាច្រើនទូទាំងពិភពលោកមានដូចជា Moony និង MamyPoko ជាដើម។
7/ Hiroshi Mikitani មានទ្រព្យសម្បត្តិ ៧,៥ ពាន់លានដុល្លារ
ជាស្ថាបនិកក្រុមហ៊ុន Rakuten ដែលមានលំនាំស្រដៀងក្រុមហ៊ុនយក្ស Amazon និង Alibaba ដែរ ខណៈ Rakuten ជាទីផ្សារអនឡាញធំបំផុតប្រចាំប្រទេសជប៉ុន។ កាលពីខែមីនាកន្លងទៅ Rakuten ទទួលការបណ្ដាក់ទុនដែលមានសាច់ប្រាក់ប្រមាណ ២ ពាន់លានដុល្លារពីក្រុមហ៊ុនយក្សចិន Tencent, Japan Post Holdings និង Walmart។
8/Akio Nitori មានទ្រព្យសម្បត្តិ ៥,២ ពាន់លានដុល្លារ
លោក Akio ជាស្ថាបនិកក្រុមហ៊ុន Nitori Holdings ដែលត្រូវបានគេស្គាល់ថាជាក្រុមហ៊ុនចែកចាយគ្រឿងសង្ហារិមធំបំផុតមួយនៅប្រទេសជប៉ុន ខណៈមានសាខាច្រើនជាង ៦០០ កន្លែងទូទាំងប្រទេស។
9/Yasumitsu Shigeta មានទ្រព្យសម្បត្តិ ៥,១ ពាន់លានដុល្លារ
ស្ថាបនិកក្រុមហ៊ុន Kikari Ssushin រូបនេះ ធ្លាប់មានទ្រព្យសម្បត្តិរហូតដល់ ៤២ ពាន់លានដុល្លារឯណោះ ប៉ុន្តែបានបាត់បង់ត្រឹមមួយពព្រិចភ្នែកក្នុងឆ្នាំ ២០០១ ដោយសារការធ្លាក់ចុះនៃទីផ្សារហ៊ុន។
បាត់ឈ្មោះពីបញ្ជីមហាសេដ្ឋី ៤ ឆ្នាំ ពោលនៅឆ្នាំ ២០០៥ មកទល់ពេលនេះ បុរសវ័យ ៥៨ ឆ្នាំអាចរក្សាតំណែងនេះបានរាងជាប់លាប់បន្ទាប់ពីក្រុមហ៊ុនHikari Tsushin ងើបឡើងវិញ។
បញ្ជាក់ដែរថា សម្រាប់ទំហំទ្រព្យសម្បត្តិរបស់បុគ្គលទាំង ៩ រូបខាងលើ គឺស្រង់ដោយទិន្នន័យចុះផ្សាយដោយ Forbes គិតត្រឹមខែមេសា ២០២១៕
ប្រភព: Forbes
