សួនសត្វនៅក្នុងប្រទេសឥណ្ឌូណេស៊ីកំពុងសិក្សាពីលទ្ធភាព នៃការបង្កាត់ពូជសត្វល្មូនប្រភេទធំបំផុតមួយលើលោក គឺត្រកួតយក្ស ដើម្បីបង្ការការដាច់ពូជនាពេលអនាគតដោយសារបញ្ហាបម្រែបម្រួលអាកាសធាតុ។
សត្វល្មូនប្រភេទនេះ គឺត្រូវបានប្រទះឃើញតែនៅតំបន់ដាច់ស្រយាលនៅកោះ Komodo និងតំបន់មួយចំនួនទៀតដែលជាប្រជុំកោះនៅភាគខាងកើតប្រទេសឥណ្ឌូណេស៊ីតែប៉ុណ្ណោះ ហើយកាលពីខែកញ្ញាកន្លងទៅ សហភាពអន្តរជាតិសម្រាប់ការអភិរក្សធម្មជាតិ IUCN បានដាក់សត្វប្រភេទនេះនៅក្នុងបញ្ជីក្រហម សម្រាប់សត្វជិតដាច់ពូជដោយសារបម្រែបម្រួលអាកាសធាតុ។
ការកើនឡើងនៃសីតុណ្ហភាពពិភពលោក និងកម្រិតទឹកសមុទ្រ នឹងធ្វើឲ្យជម្រកសត្វត្រកួតយក្សបាត់បង់បន្តិចម្ដងៗ ហើយតិចបំផុតក៏ ៣០% ក្នុងរយៈពេល ៤៥ ឆ្នាំខាងមុខ។
ដោយឡែក សម្រាប់សួនសត្វវិញបានបង្ហើបឲ្យដឹងថា ការខិតខំជួយបង្ការការដាច់ពូជសត្វត្រកួនយក្ស នឹងអាចធ្វើឲ្យថ្នាក់ដឹកនាំជាន់ខ្ពស់ទូទាំងពិភពលោកជំនុំគ្នា រិះរកមធ្យោបាយមួយដើម្បីសម្រួលវិបត្តិបម្រែបម្រួលអាកាសធាតុមួយនេះ។
បច្ចុប្បន្ន ចាប់តាំងពីបង្កើតកម្មវិធីនេះមក សួនសត្វខាងលើគឺមានសត្វត្រកួតយក្សពេញវ័យ ១០៨ ក្បាល និង ៣៥ ក្បាលទៀតគឺនៅតូចៗនៅឡើយ ខណៈក៏មានពងចំនួន ៤០ គ្រាប់កំពុងត្រៀមភ្ញាស់ផងដែរ។
បញ្ជាក់ដែរថា បើតាមស្ថិតិពី IUCN បានឲ្យដឹងថា សត្វត្រកួតយក្សដែលនៅសេសសល់លើពិភពលោកនាពេលបច្ចុប្បន្ន គឺមានមិនដល់ ១ ៤០០ ក្បាលទេ ខណៈភាគច្រើនគឺមាននៅប្រទេសឥណ្ឌូណេស៊ី៕
ប្រភព: Kelo
