បច្ចុប្បន្ន Elon Musk បានក្លាយជាមហាសេដ្ឋីមានបំផុតលើលោក ដោយបានវ៉ាដាច់លោក Jeff Bezos ដែលជាស្ថាបនិកក្រុមហ៊ុន Amazon ធ្លាប់កាន់តំណែងអ្នកមានកំពូលប៉ុន្មានឆ្នាំចុងក្រោយ។
យ៉ាងណា បើមើលឲ្យកាន់តែស៊ីជម្រៅទៅ CEO ក្រុមហ៊ុន Tesla មួយរូបនេះមិនត្រឹមតែជាមហាសេដ្ឋីមានបំផុតនាពេលបច្ចុប្បន្នឡើយ ពោលគឺលោកក៏បានបំបែកកំណត់ត្រាប្រវត្តិសាស្ត្រមួយ គឺជាបុគ្គលមានទ្រព្យច្រើនបំផុតប្រចាំប្រវត្តិសាស្ត្រផងដែរ។
កន្លងមកបុគ្គលដែលជាប់ឈ្មោះជាមហាសេដ្ឋីមានបំផុតប្រចាំប្រវត្តិសាស្ត្រគឺ លោក John D. Rockefeller ដែលបានចែកឋានទៅកាលពីឆ្នាំ ១៩៣៧ នៅអាយុ ៩៨ ឆ្នាំ ខណៈលោកគឺត្រូវបានគេស្គាល់ថា ជាអ្នកជំនួញល្បីឈ្មោះក្នុងវិស័យប្រេងឆៅ រហូតក្លាយជាអ្នកផ្គត់ផ្គង់ប្រេងផ្ដាច់មុខទូទាំងពិភពលោកនាសម័យនោះ។
សម្រាប់ទំហំទ្រព្យសម្បត្តិរបស់លោកវិញគឺមិនត្រូវបានគេដឹងពីចំនួនជាក់លាក់ឡើយ ព្រោះដោយសារបម្រែបម្រួលអត្រាលុយពីមួយសម័យទៅមួយសម័យកាលមានភាពខុសគ្នា ដោយគេសន្មតថា វាអាចស្ថិតនៅក្នុងចន្លោះខ្ទង់ ៣០០ ទៅ ៤០០ ពាន់លានដុល្លារ ខណៈចំនួនដែលគេឧស្សាហ៍និយាយគឺ ៣៤០ ពាន់លានដុល្លារ។
ក្នុងរយៈពេលជាង ៨០ ឆ្នាំមកនេះ គឺមិនធ្លាប់មានបុគ្គលណាម្នាក់អាចតាមទាន់កំណត់ត្រារបស់លោក John D. Rockefeller ឡើយ ដោយមានមនុស្សម្នាក់ Andrew Carnegie អ្នកជំនួញផ្នែកដែកថែប តែកាលនោះលោកមានទ្រព្យត្រឹម ៣១០ ពាន់លានដុល្លារមិនសូម្បីកៀកនឹងទំហំដ៏មហិមារបស់ស្ដេចប្រេងឆៅ Rockefeller។
តែអ្វីដែលគួរឲ្យភ្ញាក់ផ្អើលនោះ គឺកាលពីថ្ងៃទី ០៤ វិច្ឆិកាកន្លងទៅនោះ Elon Musk បានធ្វើឲ្យពិភពលោកចំហមាត់ភ្ញាក់ផ្អើលគ្រប់គ្នា ដោយសារទំហំទ្រព្យសម្បត្តិរបស់លោកបានហក់ឡើងតាមទាន់កំណត់ត្រាអាយុកាល ៨០ ឆ្នាំ គឺ ៣៤០ ពាន់លានដុល្លារដែលវាគឺជាការកើតឡើងដំបូងបង្អស់មិនធ្លាប់មានក្នុងរយៈកាលជិតមួយសតវត្សមកនេះ៕
ប្រភព: celebritynetworth
