នៅត្រីមាសនេះ ប្រាក់ចំណេញរបស់ក្រុមហ៊ុនយក្សពាណិជ្ជកម្មអនឡាញ អាលីបាបា បានធ្លាក់ចុះ អស់ ៨១% ក្រោយប៉ែងជើងពីអាជ្ញាធរតាមរយៈច្បាប់រឹតបន្តឹងនិងគ្រប់គ្រងអ៊ីនធើណេត ខណៈទីក្រុងប៉េកាំង ក៏បានរឹតបន្តឹងច្បាប់ថ្មីទៅលើក្រុមហ៊ុនបច្ចេកវិទ្យាធំៗរបស់ប្រទេសនេះ។
លទ្ធផលប្រចាំត្រីមាសនេះ ត្រូវបានប្រកាសឡើង ចំថ្ងៃពេល Paytm ក្រុមហ៊ុនជើងឯកផ្នែកបង់ប្រាក់តាមអនឡាញ នៅឥណ្ឌា ដែលអាលីបាបា និង Ant Group មានហ៊ុនដែរ ចូលប្រលូកក្នុងទីផ្សារមូលប័ត្រនៅទីក្រុងប៊ុមបៃ ក្នុងថ្ងៃទីមួយ។ ដោយហេតុតែក្រុមអ្នកវិនិយោគមិនទុកចិត្ត Paytm បានដាំក្បាលខាតថ្លៃ អស់២៥% ក្នុងរយៈពេលតែប៉ុន្មាននាទី និងបានអូសទាញភាគហ៊ុនរបស់អាលីបាបា នៅហុងកុងឱ្យធ្លាក់ចុះអស់ជាង ១០%ដែរ។
ក្រុមហ៊ុនរបស់លោក ជេក ម៉ា ដឹងថាហានិភ័យនិងភាពមិនច្បាស់លាល់ អាចរំខានដល់សកម្មភាពពាណិជ្ជកម្មរបស់ខ្លួន ខណៈដែល អាលីបាបា រំពឹងថានៅឆ្នាំនេះ សកម្មភាពលក់ដូរនឹងកើនពី ២០ ទៅ ៣០% ប៉ុន្តែបើតាមលទ្ធផលជាក់ស្តែង នៅត្រីមាស២ ក្រុមហ៊ុនទទួលបានប្រាក់ចំណេញយ៉ាងតិចតួចបំផុត គឺត្រឹមតែប្រមាណ ៥,៣៧ ពាន់លានយ័ន (៧៤១,៣លានអឺរ៉ូ) ប៉ុណ្ណោះ សម្រាប់រយៈពេលពីខែកក្កដា ដល់ខែកញ្ញា ទល់នឹង២៨,៧ ពាន់លានយ័ន កាលពីឆ្នាំកន្លងទៅក្នុងរយៈពេលដូចគ្នា។ ពោលគឺប្រាក់ចំណេញរបស់ក្រុមហ៊ុនបានធ្លាក់ចុះអស់ ៨១% ក្នុងនោះដែលប្រាក់ចំណូលសរុបបានកើនឡើងដល់ទៅ ២៩% ក្នុងមួយឆ្នាំនេះ។
មិនមែនតែអាលីបាបា ធ្លាក់ចុះប្រាក់ចំណេញនោះទេ សូម្បីក្រុមហ៊ុន JD.com ដែលជាគូប្រជែងរបស់អាលីបាបានៅក្នុងប្រទេសចិន ក៏ប្រកាសខាតបង់ប្រាក់ចំណេញអស់ចំនួន ២,៨ពាន់លានយ័ន (៣៨៦,៦លានអឺរ៉ូ) ដែរនៅត្រីមាសទីពីរនេះ ទល់នឹង៧,៦ពាន់លានយ័នកាលពីមួយឆ្នាំមុន៕
