អង្គការការពារសត្វព្រៃទាំងក្នុងស្រុក និងអន្តរជាតិពេញចិត្តការសម្រេចចិត្តរបស់តុលាការជាន់ខ្ពស់ លើការកាត់ទោសស្ដេចត្រាញ់ Premchai Karnasuta ឲ្យជាប់ពន្ធនាគាររយៈពេល ៣ ឆ្នាំ ២ ខែ ក្រោមបទល្មើសសម្លាប់សត្វព្រៃកាលពី ៤ ឆ្នាំមុន។
ក្រៅពីមហាសេដ្ឋីនេះ ក៏នៅមានបុគ្គល ២ រូបផ្សេងទៀតត្រូវបានកាត់ទោសក្រោមបទល្មើសតែមួយ ដែលមានអតីតអ្នកបើករថយន្តផ្ទាល់ខ្លួនរបស់លោក Premchai គឺ Yong Dodkruea ជាប់ពន្ធនាគាររយៈពេល ៣ ឆ្នាំ ៥ខែ ខណៈព្រានព្រៃ Thanee Thummat ជាប់ពន្ធនាគារ ៣ ឆ្នាំ ៩ ខែ។
ដោយឡែក បើតាមក្រុមការពារក្ដីរបស់ Premchai ដែលមិនត្រូវបានបង្ហើបឈ្មោះបានប្រាប់ទៅកាន់សារព័ត៌មានថា កូនក្ដីរបស់ពួកគេគឺមិនមានអ្វីបកស្រាយឡើយ ក្រៅពីគោរពតាមការសម្រេចចិត្តរបស់តុលាការ។
យ៉ាងណា តុលាការកំពូលបានសម្រេចតម្កល់ទោសនៃការជាប់ពន្ធនាគារ ដោយសារកាលពី ២ ឆ្នាំមុនច្បាប់នៃការការពារសិទ្ធិសត្វព្រៃ និងការដាក់ទោសមានការកែប្រែ ស្របពេលបុរសទាំង ៣ នាក់នេះត្រូវបានរួចទោសពីការចោទប្រកាន់ខាងលើ តែក្រោយមករកឃើញថាជាប់ពាក់ព័ន្ធនឹងការចិញ្ចឹមសត្វព្រៃខុសច្បាប់ ដូច្នេះត្រូវជាប់ពន្ធនាគាររយៈពេល ៨ ខែ និងពិន័យជាទឹកប្រាក់ម្នាក់ ២ លានបាត។
បញ្ជាក់ដែរថា ជនជាប់ចោទទាំង ៣ នាក់ត្រូវបានឃាត់ខ្លួននៅជំរុំរបស់ពួកគេនៅតំបន់ Thungyai Naresuan Wildlife Sanctuary កាលពីថ្ងៃទី ០៤ កុម្ភៈ ២០១៨ ក្រោមបទចោទប្រកាន់ពីការបរបាញ់សត្វព្រៃ រាប់បញ្ចូលទាំងការសម្លាប់សត្វខ្លាខ្មៅ (Black Panther) យ៉ាងកម្រ សត្វក្រៀល (Kalij Pheasant) និងសត្វក្ដាន់ Barking deer៕
ប្រភព: bangkokpost
