ក្រុមហ៊ុន China Evergrande Group បាននិយាយថានៅថ្ងៃព្រហស្បតិ៍ នៅក្នុងគណនី WeChat ថា ៩១,៧% នៃគម្រោងរបស់ខ្លួន បានបន្តការសាងសង់ឡើងវិញហើយ បន្ទាប់ពីកិច្ចខិតខំប្រឹងប្រែងអស់រយ:ពេលបីខែកន្លងមកនេះ ។
ជាក់ស្តែងប្រធានក្រុមហ៊ុន លោក Hui Ka Yan បានប្តេជ្ញា នៅក្នុងកិច្ចប្រជុំមួយ កាលពីថ្ងៃអាទិត្យសប្តាហ៍មុនថា នឹងផ្តល់ជូនអចលនទ្រព្យចំនួន ៣៩ ០០០ ខ្នងដល់អតិថិជន នៅក្នុងខែធ្នូនេះ បើធៀបនឹងចំនួនតិចជាង ១០ ០០០ ខ្នង ក្នុងរយ:ពេល ៣ ខែមុន ។
មិនតែប៉ុណ្ណោះ ភាគហ៊ុនរបស់ក្រុមហ៊ុនអចលនទ្រព្យខ្នាតយក្សរបស់ចិនមួយនេះ ក៏បានហក់ឡើងខ្ពស់ដល់ ៨% ផងដែរ កាលពីថ្ងៃអង្គារ៍ បន្ទាប់ពីពួកគេបានអះអាងថានឹងពន្លឿនការងារសាងសង់ ឲ្យបានច្រើនបំផុតតាមដែលអាចធ្វើទៅបាន ។
សូមបញ្ជាក់ផងដែរថា Evergrande បានធ្លាក់ចូលទៅក្នុងស្ថានភាពដ៏លំបាកបំផុតមួយ ដោយសារតែជាប់បំផុតដ៏ច្រើនបំផុតរហូតដល់ទៅ ៣០០ ពាន់លានដុល្លារអាមេរិក ហើយពួកគេក៏បានក្លាយជាក្រុមហ៊ុន ដែលជាប់បំណុលច្រើនបំផុតនៅក្នុងប្រទេសចិនផងដែរ ។
តែទោះជាយ៉ាងណាក៏ដោយ ក្រុមហ៊ុន បាននឹងកំពុងតែព្យាយាមយ៉ាងខ្លាំង ដើម្បីធ្វើការប្រមែប្រមូល សាច់ប្រាក់ តាមរយ:ការលក់ទ្រព្យសកម្ម និងភាគហ៊ុនរបស់ខ្លួន ដើម្បីដោះស្រាយបំណុល ៕
ប្រភព: Money.US
