ចូលដល់ឆ្នាំ ២០២២ ភ្លាម ទ្រព្យសម្បត្តិរបស់មហាសេដ្ឋីជាច្រើននាក់មានការធ្លាក់ចុះជាគំហុក តួយ៉ាង Elon Musk របូតទ្រព្យអស់ប្រមាណជាង ៥០ ពាន់លានដុល្លារឯណោះ ខណៈ Jeff Bezos វិញក៏ខាតយ៉ាងដំណំដែរ ពោលប្រមាណជិត ២៨ ពាន់លានដុល្លារ។
ទោះទ្រព្យសម្បត្តិរបស់ CEO ក្រុមហ៊ុន Tesla ថយចុះដល់ទៅជាង ៥០ ពាន់លានដុល្លារក្ដី តែទ្រព្យដែលនៅសេសសល់បច្ចុប្បន្នប្រមាណ ២១៦ ពាន់លានដុល្លារទៀតនោះ ក៏នៅតែអាចរក្សាងារជាបុគ្គលមានបំផុតលើលោករបស់ស្ថាបនិកក្រុមហ៊ុន SpaceX ដដែល។
ស្របពេលមហាសេដ្ឋីជាច្រើនកំពុងពិបាកចិត្តជាមួយនឹងការថយចុះទ្រព្យរាប់ពាន់លានដុល្លារ តែបិតាវិនិយោគិន Warren Buffet ឯណេះវិញ គឺមិនបានឈឺក្បាលហាលថ្ងៃឡើយ ពោលមិនបានបាត់បង់សូម្បីមួយកាក់មួយសេន ថែមទាំងកើនទ្រព្យជាង ២ ពាន់លានដុល្លារទៀតផង។
យោងតាមការចុះផ្សាយពី Bloomberg Billionare Index កាលពីសប្ដាហ៍មុនឲ្យបានដឹងថា ទ្រព្យសម្បត្តិរបស់ Buffet បានកើនឡើងប្រមាណ ២,៤ ពាន់លានដុល្លារ ដែលធ្វើឲ្យទ្រព្យសម្បត្តិសរុបរបស់លោកឡើងដល់ ១១១ ពាន់លានដុល្លារ។
ដោយឡែក មូលហេតុដែលធ្វើឲ្យបិតាវិនិយោគិនម្នាក់នេះមិនរវីរវល់ជាមួយការខាតបង់ដូចនឹងមហាសេដ្ឋីផ្សេងទៀតគឺដោយសារ មហាសេដ្ឋីភាគច្រើនគឺរកស៊ីលើវិស័យបច្ចេកវិទ្យា ដែលមានភាគហ៊ុនធំផ្សារភ្ជាប់តែមួយ តែសម្រាប់ Berkshire Hathaway របស់ Warren Buffet វិញ គឺមានផលប័ត្រភាគហ៊ុនយ៉ាងទូលំទូលាយលើវិស័យជាច្រើន ដែលអាចធានាបានយ៉ាងល្អថា ទោះទីផ្សារបច្ចេកវិទ្យាក្រឡុកខ្លាំងយ៉ាងណា ក៏ Buffet មិនបានឈឺក្បាលហាលថ្ងៃជាមួយវាឡើយ៕
ប្រភព: indiatimes
