កាលពីថ្ងៃទី ២៤ កុម្ភៈកន្លងទៅ រុស្ស៊ីបានធ្វើឲ្យមហាជនមានការស្លន់ស្លោជាខ្លាំង ជាមួយនឹងការប្រកាសសង្គ្រាមនឹងប្រទេសជិតខាងគឺ អ៊ុយក្រែនដោយបានទម្លាក់គ្រាប់បែកនៅទីក្រុង គៀវ។
ជាមួយនឹងការវាយប្រហារយ៉ាងគំហុកនេះ គឺមានការសន្និដ្ឋានជាច្រើនអំពីការសម្រេចចិត្តរបស់ប្រធានាធិបតី Vladimir Putin តែបើតាមការអះអាងពី ndtv បានឲ្យដឹងថា មូលហេតុដែលរុស្ស៊ីដាច់ចិត្តវៃអ៊ុយក្រែនគឺដោយសារ ចង់បញ្ឈប់មហិច្ឆតារបស់ NATO ក្នុងការពង្រីកវិសាលភាពរបស់ពួកគេមកកាន់ប៉ែកខាងកើត។
ប្រភពខាងលើក៏បានរៀបរាប់ត្រួសៗអំពីជម្លោះកន្លងមករវាងប្រទេសធំបំផុតទាំង ២ នៅតំបន់អឺរ៉ុបផងដែរ ដោយបានអះអាងថា គ្រប់យ៉ាងផ្ដើមចេញតាំងពីឆ្នាំ ២០១៤ មកម៉្លេះ ហើយវាកាន់តែក្ដៅនៅពេលដែលប្រធានាធិបតី Volodymyr Zelenskyy ទទូចឲ្យ Joe Biden ដាក់អ៊ុយក្រែនចូលជាសមាជិក NATO។
ត្រឡប់ទៅកាលឆ្នាំ ២០១៤ បន្តិច ដែលគ្រានោះជាការចាប់ផ្ដើមជម្លោះតំបូងរវាងប្រទេសទាំង ២ ដោយកាលនោះ ក្រុមឧទ្ទាមដែលគាំទ្រដោយ Putin បានធ្វើការវាយដណ្ដើមយកទីក្រុងមួយចំនួននៅភាគខាងកើតនៃប្រទេសអ៊ុយក្រែន។
សង្គ្រាមមួយប្រាវគ្រានោះរវាងក្រុមឧទ្ទាមដែលគាំទ្រដោយប្រធានាធិបតីរុស្ស៊ី និងក្រុមប៉ូលីសអ៊ុយក្រែនបានធ្វើឲ្យបាត់បង់ជីវិតមនុស្សប្រមាណ ១៤ ០០០ នាក់ ហើយមកទល់សព្វថ្ងៃជម្លោះមួយនេះនៅមិនទាន់រំសាយនៅដាច់ស្រេចនៅឡើយ។
ចាប់តាំងពីពេលនោះមករុស្ស៊ីយកលេសបង្ហាត់ទ័ព ដោយបានបញ្ជូនទ័ពជាហូរហែមកកាន់តំបន់ព្រំដែនរុស្ស៊ី-អ៊ុយក្រែន ហើយក៏ត្រូវទទួលបានការព្រមានពីប្រធានាធិបតីអាមេរិក Biden ថា បើសិនតែហ៊ានឈ្លានពានអ៊ុយក្រែន នោះរុស្ស៊ីច្បាស់ជាទទួលទណ្ឌកម្មសេដ្ឋកិច្ចជាមិនខាន។
ប្រភពខាងលើបន្ថែមទៀតថា រុស្ស៊ីបានប្រកាសថា ប្រទេសនៅលោកខាងលិចត្រូវតែសន្យាថា NATO នឹងមិនលូកដៃនៅរាល់គ្រប់សកម្មភាពសង្គ្រាមនៅអឺរ៉ុបខាងកើត និងអ៊ុយក្រែនឡើយ តែថ្មីៗនេះលឺដំណឹងមកថា NATO បានជួបពិភាក្សាជាមួយប្រទេសដែលជាសមាជិកក្នុងការរកដំណោះស្រាយជុំវិញបញ្ហានេះហើយ។
រំលឹកបន្តិចថា រុស្ស៊ី និងអ៊ុយក្រែនធ្លាប់ជាសមាជិកតំបូងនៃការបង្កើតសហភាពសូវៀត តែអ៊ុយក្រែនបានផ្ដាច់ខ្លួនចេញនៅឆ្នាំ ១៩៩១ និងបានប្រកាសឯករាជ្យដោយខ្លួនឯងនៅថ្ងៃទី ២៤ សីហា ១៩៩១។
ដោយសារប្រទេស ២ នេះធ្លាប់ជ្រកក្រោមដំបូលតែមួយ ដូច្នេះហើយទាំងវប្បធម៌ អរិយធម៌ និងការរស់នៅប្រាស្រ័យទាក់ទងគ្នា គឺមានចំណងយ៉ាងស្អិតល្មួត តែតាំងពីមានជម្លោះឆ្នាំ ២០១៤ នោះមក ចំណងមិត្តភាពទាំងនោះបានរលាយបាត់បន្តិចម្ដងៗ៕
ប្រភព: NDTV
