ក្រុមហ៊ុន Apple បានប្រកាសកាលពីថ្ងៃអង្គារថា ខ្លួននឹងបញ្ឈប់ការលក់ផលិតផលទាំងអស់ នៅក្នុងប្រទេសរុស្ស៊ី ខណ:ពេលដែលពួកគេបានក្លាយជាក្រុមហ៊ុនលំដាប់កំពូលចុងក្រោយមួយ ដែលបានសម្រេចចិត្តធ្វើបែបនេះ បន្ទាប់ពីមានការឈ្លានពានរបស់រដ្ឋាភិបាលទីក្រុងម៉ូស្គូ ទៅលើអ៊ុយក្រែន ។
ជាក់ស្តែង រដ្ឋាភិបាលប្រទេសនៅលោកខាងលិច រួមទាំងអង្គភាពកីឡារ និងក្រុមហ៊ុនធំៗជាច្រើន បានសម្រេចចិត្តកាត់ផ្តាច់ទំនាក់ទំនងជាមួយរុស្ស៊ី និងបានធ្វើការដាក់ទណ្ឌកម្មផ្នែកសេដ្ឋកិច្ចយ៉ាងធ្ងន់ធ្ងរ ជុំវិញការវាយប្រហារទៅលើប្រទេសជិតខាងរបស់ពួកគេ ។
យ៉ាងណា សេចក្តីថ្លែងការណ៍មួយរបស់ក្រុមហ៊ុន Apple បាននិយាយថា ” យើងបានផ្អាកការលក់ផលិតផលទាំងអស់ នៅក្នុងប្រទេសរុស្ស៊ី។ ហើយកាលពីសប្តាហ៍មុន យើងបានបញ្ឈប់ការនាំចេញទាំងអស់ផលិតផលទាំអស់ មកកាន់ទីផ្សារ របស់ប្រទេសនេះផងដែរ ” ។
បន្ថែមពីនេះ ក្រុមហ៊ុនផលិតទូរស័ព្ទ iPhone ក៏បានប្រកាស់ថាសេវាកម្ម Apple Pay និងសេវាកម្មផ្សេងទៀត ក៏ត្រូវបានដាក់ឱ្យស្ថិតនៅក្នុងដែនកំណត់ផងដែរ ចំពេលដែលប្រព័ន្ធផ្សព្វផ្សាយរដ្ឋរុស្ស៊ី RT និងកម្មវិធីព័ត៌មាន Sputnik ក៏លែងមាន សម្រាប់ឱ្យធ្វើការទាញយក នៅខាងក្រៅប្រទេសរុស្ស៊ីទៀតផងដែរ ។
ជាមួយគ្នានេះ សេចក្តីថ្លែងការណ៍ដាច់ដោយឡែករបស់ Apple មួយផ្សេងទៀត បាននិយាយថា ” យើងមានការព្រួយបារម្ភយ៉ាងខ្លាំងចំពោះការលុកលុយរបស់រុស្ស៊ីលើអ៊ុយក្រែន ហើយយើងនឹងនៅជាមួយប្រជាជនទាំងអស់ដែលរងទុក្ខដោយសារលទ្ធផលនៃការវាយប្រហារនេះ “។
“ យើងកំពុងគាំទ្រកិច្ចខិតខំប្រឹងប្រែងផ្នែកមនុស្សធម៌ តាមរយ:ការផ្តល់ជំនួយសម្រាប់វិបត្តិជនភៀសខ្លួនដែលកំពុងមានការកើនឡើង” ៕
ប្រភព: Bangkok Post
