កាលពីពេលថ្មីៗនេះ លោកប្រធានាធិបតីនៃប្រទេសអ៊ុយក្រែន Volodymyr Zelensky បានធ្វើការព្រមានដល់ប្រទេសលោកខាងលិចថា សង្គ្រាមនឹងមិនបញ្ឈប់ត្រឹមអ៊ុយក្រែនឡើយ ពោលគឺនឹងរីករាលដាលទូទាំងពិភពលោក បើវាមិនបញ្ឈប់ឆាប់ៗនេះ។
នៅក្នុងកិច្ចសម្ភាសន៍ជាមួយ ABC World News Tonight ជាមួយនឹង David Muir លោក Zelensky បានស្នើសុំឲ្យអាមេរិក និងអង្គការ NATO ជួយចេញមុខអន្តរាគមន៍ឲ្យបានទាន់ពេលវេលា និងកុំព្យាយាមគេចវែសឲ្យសោះ។
ប្រធានាធិបតីរូបនេះបានអះអាងថា ប្រធានាធិបតីអាមេរិក Joe Biden គឺមានសមត្ថភាពគ្រប់គ្រាន់ក្នុងការបញ្ឈប់សង្គ្រាមមួយនេះបាន ស្របពេលអាមេរិក និង NATO បានចេញមុខប្រឆាំងចំពោះការបង្កើតច្បាប់បញ្ឈប់ផ្លូវអាកាសនៅអ៊ុយក្រែន (No-Fly Zone) ដោយបានជឿថា ការប្រើប្រាស់វិធីសាស្ត្រមួយនេះគឺនឹងអាចបង្កឲ្យមានសង្គ្រាមទូទាំងតំបន់អឺរ៉ុប។
ជាការពិត កាលពីថ្ងៃសៅរ៍កន្លងទៅ ប្រធានាធិបតីរុស្ស៊ី Vladimir Putin បានទម្លាយឲ្យដឹងដែរថា បើសិនជាប្រទេសណាមួយដែលយល់ព្រមចេញច្បាប់បិទផ្លូវអាកាស នោះលោកនឹងចាត់ទុកថាជាការចូលរួមនៅក្នុងវិវាទមួយនេះជាមិនខាន។
បញ្ជាក់ដែរថា ប្រធានាធិបតី Zelensky បានអះអាង និងព្រមានទៅកាន់ប្រទេសលោកខាងលិចថា៖ “គ្រប់គ្នាប្រហែលជាគិតថា ពួកយើង (អ៊ុយក្រែន) គឺនៅឆ្ងាយខ្លាំងពីអាមេរិក ឬក៏កាណាដា តែការពិតមិនដូច្នោះទេ ព្រោះពួកយើងសុទ្ធតែស្ថិតនៅក្នុងតំបន់សេរីភាពទាំងអស់គ្នា។ នៅពេលដែលសិទ្ធិសេរីភាពត្រូវបានបំពាន អ្នកត្រូវតែការពារពួកយើង ព្រោះពួកយើងអាចនឹងជាចំណុចចាប់ផ្ដើម ប៉ុន្តែអ្នកនឹងក្លាយជាចំណុចបន្ទាប់ ហើយវានឹងរីកធំទៅៗ”៕
ប្រភព: CNN
