កាលពីពេលថ្មីៗនេះ ប្រធានាធិបតីអាមេរិក Joe Biden បានទម្លាយឲ្យដឹងថា អង្គការ North Atlantic Treaty Organization ហៅកាត់ NATO នឹងលូកដៃចូលក្នុងវិវាទរុស្ស៊ី-អ៊ុយក្រែន ក្នុងករណីរុស្ស៊ីប្រើប្រាស់អាវុធគីមីសម្រាប់វាយប្រហារទៅលើអ៊ុយក្រែន។
“ពួកយើងនឹងធ្វើការឆ្លើយតបភ្លាមៗ បើសិនជាគាត់ (រុស្ស៊ី) ប្រើប្រាស់វា (អាវុធគីមី)ក្នុងសង្គ្រាម”។ នេះបើតាមសម្ដីរបស់លោក Biden បាននិយាយ ពេលសួរតើសហរដ្ឋអាមេរិក និង NATO នឹងចូលដៃក្នុងសង្គ្រាមរវាងរុស្ស៊ី និងអ៊ុយក្រែនដែរទេ។
ចំណុចសំខាន់មួយទៀតដែលពាក់ព័ន្ធក្នុងករណីមួយនេះគឺ អង្គលេខាធិការអង្គការ NATO លោក Jens Stoltenberg បានបង្ហើបឲ្យដឹងកាលពីថ្ងៃព្រហស្បតិ៍ថា NATO បានត្រៀមរួចស្រេចក្នុងការបញ្ជាឲ្យប្រើប្រាស់ទាំងអាវុធគីមី អាវុធជីវសាស្ត្រ និងប្រព័ន្ធការពារគ្រាប់បែកនុយក្លេអ៊ែរ បើសិនជារុស្ស៊ីប្រើប្រាស់អាវុធគីមីទៅលើអ៊ុយក្រែន ដែលជះឥទ្ធិពលអាក្រក់ដល់ធម្មជាតិ។
បញ្ជាក់ដែរថា ការសម្រេចចិត្តរបស់ NATO គឺធ្វើឡើងក្រោយប្រធានាធិបតី Vladimir Putin បដិសេធមិនព្រមលុបចោលការប្រើប្រាស់គ្រាប់បែកនុយក្លេអ៊ែរទៅលើអ៊ុយក្រែន ស្របពេលអ្នកនាំពាក្យ Dmitry Peskov បានទម្លាយថា បើសិនជាមានការគម្រាមកំហែងលើអថិរភាពរបស់រុស្ស៊ី នោះពួកគេនឹងប្រើប្រាស់មធ្យោបាយចុងក្រោយគឺ បាញ់គ្រាប់បែកនុយក្លេអ៊ែរ៕
ប្រភព: Livemint
