ដូចបានដឹងរួចមកហើយថា បច្ចុប្បន្នមហាសេដ្ឋីរុស្ស៊ីរាប់រយនាក់កំពុងស្ថិតនៅក្នុងស្ថានការណ៍ដ៏យ៉ាប់យ៉ឺនមួយ គឺប្រទេសជាច្រើនទាំងនៅតំបន់អឺរ៉ុប និងលោកខាងលិចកំពុងសម្រុកដាក់ទណ្ឌកម្មសេដ្ឋកិច្ចទៅលើពួកគេ ដោយសាររុស្ស៊ីបានឈ្លានពានអ៊ុយក្រែន។
មូលហេតុដែលលោកខាងលិច និងតំបន់អឺរ៉ុបពួតដៃគ្នាដាក់គំនាបសេដ្ឋកិច្ចទៅលើរុស្ស៊ី គឺរំពឹងថា នឹងអាចឲ្យប្រធានាធិបតី Vladimir Putin ពិចារណាបញ្ឈប់ការវាយប្រហារទៅលើប្រទេសជិតខាងមួយនេះ។
យ៉ាងណា គោលគំនិតខាងលើគឺត្រូវបានបដិសេធទាំងស្រុងពីសំណាក់អតីតប្រធានាធិបតីរុស្ស៊ី Dmitry Medvedev ដោយលោកបានអះអាងថា ទោះពិភពលោកខំដាក់ទណ្ឌកម្មសេដ្ឋកិច្ចទៅលើរុស្ស៊ីកម្រិតណា ក៏មហាអំណាចមួយនេះមិនឈឺក្បាលជាមួយឡើយ។
លោកថែមទាំងនិយាយថា ការដែលជឿថាទណ្ឌកម្មសេដ្ឋកិច្ចអាចបង្អាក់ដំណើររបស់រុស្ស៊ី គឺជារឿងគួរឲ្យអស់សំណើចបំផុត ដ្បិតមហាសេដ្ឋី និងអ្នកជំនួញធំៗរុស្ស៊ីមិនមែនជាកម្លាំងសំខាន់របស់រដ្ឋាភិបាលរុស្ស៊ីឡើយ ហើយទណ្ឌកម្មសេដ្ឋកិច្ចនោះទៀតសោត វាកាន់តែធ្វើឲ្យសង្គមរុស្ស៊ីរឹងមាំជាងមុន។ នេះបើតាមការអះអាងរបស់ Medvedev ទៅកាន់ RIA។
“ឥឡូវខ្ញុំសុំសួរអ្នករាល់គ្នាមួយ តើមហាសេដ្ឋីអស់ទាំងនោះមានចំណែកសំខាន់ប៉ុនណានៅក្នុងជួររដ្ឋាភិបាល និងជួយអ្វីបានខ្លះដល់ថ្នាក់ដឹកនាំជាតិ? ចម្លើយគឺ ពួកគេមិនបានជួយអ្វីឡើយ”។ នេះបើតាមសម្ដីរបស់អតីតប្រធានាធិបតីរុស្ស៊ីប្រាប់នៅក្នុងបទសម្ភាសន៍៕
ប្រភព: AFR
