កូនប្រុសរបស់អតីតមេដឹកនាំផ្តាច់ការហ្វីលីពីន លោក Ferdinand Marcos Jr ឈ្នះការបោះឆ្នោតក្លាយប្រធានាធិបតីថ្មី កាលពីថ្ងៃចន្ទដើមសប្តាហ៍នេះ។ ការណ៍នេះ លោកនឹងត្រូវឡើងជំនួសលោក Rodrigo Duterte ដែលចប់អាណត្តិ។
បើតាមសារព័ត៌មាន Ruters លទ្ធផលបោះឆ្នោតរាប់បាន ៩០ភាគរយ, លោក ម៉ាកូស ទទួលបានសំឡេងគាំទ្រ ២៩.៩លានសំឡេង ពោលគឺច្រើនជាងគូប្រជែងរបស់លោក គឺលោកស្រីអនុប្រធានាធិបតី Leni Robredo ដល់ទៅ ២ដង។ ចំណែកលទ្ធផលបោះឆ្នោតផ្លូវការត្រូវបានគេពឹងថានឹងត្រូវចេញផ្សាយនៅចុងខែឧសភានេះ។
លោក Ferdinand Marcos Jr ជាកូនប្រុសរបស់លោក Ferdinand Marcos ដែលធ្លាប់បានកាន់អំណាចផ្តាច់ការ នៅហ្វីលីភីន អំលុងទសវត្សរ៍១៩៧០និង៨០ ដែលបានធ្វើឲ្យមនុស្ស ៧ម៉ឺននាក់ ត្រូវគេសម្លាប់ ត្រូវរងទារុណកម្ម និងត្រូវគេរំលោភផ្លូវភេទ។ នេះបើតាមអង្គការ Amnesty International។
លោក Ferdinand Marcos បានភៀសខ្លួនរត់ចោលស្រុក និងស្លាប់នៅសហរដ្ឋអាមេរិក ឆ្នាំ១៩៨៧។ លោកត្រូវជាប់ឈ្មោះថា ជាមេដឹកនាំផ្តាច់ការ និងបានលួចលុយជាតិ ១០ពាន់លានដុល្លារ។ ពេលឥឡូនេះ កូនប្រុសរបស់លោកបានឈានឆ្ពោះទៅការកាន់អំណាចឡើងវិញនៃគ្រួសារអ្នកនយោបាយ Marcos។
នៅក្នុងយុទ្ធនាការឃោសនាបោះឆ្នោតកាលពីពេលថ្មីៗនេះ លោក Ferdinand Marcos Jr មានអាយុ ៦៤ឆ្នាំ បានសន្យាថាលោកនឹងដោះស្រាយបញ្ហាជាច្រើនដែលជាកង្វល់របស់ប្រជាជនហ្វីលីពីន ក្នុងនោះដូចជា ការបង្កើតការងារ បញ្ហាទំនិញឡើងថ្លៃ និងស្វែងរកឯកភាពជាតិជូនហ្វីលីពីនផងដែរ៕
