កាលពីថ្ងៃទី ១១ ឧសភាកន្លងទៅ តម្លៃហ៊ុនរបស់ក្រុមហ៊ុនស្ករគ្រាប់ Kopiko ដែលជាក្រុមហ៊ុនរបស់ប្រទេសឥណ្ឌូណេស៊ី មានការកើនឡើងដល់ទៅ ៧,៣% បន្ទាប់ពី Elon Musk បានភ្លក្សស្ករគ្រាប់រសជាតិកាហ្វេ និងបានលើកមេដៃបញ្ជាក់ពីរសជាតិដ៏ឆ្ងាញ់របស់វា។
យោងតាមការចុះផ្សាយពី South China Morning Post បានឲ្យដឹងថា មហាសេដ្ឋីមានបំផុតលើលោកបានជួបពិភាក្សាជាមួយនឹងរដ្ឋមន្ត្រីសម្របសម្រួលកិច្ចការសមុទ្រ និងវិនិយោគនៃប្រទេសឥណ្ឌូណេស៊ី Luhut Pandjaitan ហើយរដ្ឋមន្ត្រីរូបនេះបានដកស្ករគ្រាប់ Kopiko ឲ្យ Elon Musk ភ្លក្សក្នុងពេលពិភាក្សានោះ។
ប្រភពដដែលបន្ថែមថា ប្រធានបទនៃការជួបចរចារវាងរដ្ឋមន្ត្រីឥណ្ឌូណេស៊ី និងមេធំ Tesla គឺឥណ្ឌូណេស៊ីមានបំណងចង់ពង្រីកខ្លួនផ្នែកផលិតយានយន្តអគ្គិសនី និងចង់សុំឱកាសវិនិយោគបន្ថែមលើវិស័យមួយនេះ។
បញ្ជាក់ដែរថា ស្ករគ្រាប់ Kopiko គឺគ្រប់គ្រងដោយក្រុមហ៊ុនមេ Mayora Indah ដែលបានស្ថាបនាឡើងនៅឆ្នាំ ១៩៨២ ហើយបច្ចុប្បន្នផលិតផលដ៏ពេញនិយមមួយនេះកំពុងមានវត្តមាននៅច្រើនជាង ៨០ ប្រទេសលើពិភពលោក។
ក្រុមហ៊ុនខាងលើក៏ជាកម្មសិទ្ធិរបស់មហាសេដ្ឋីមានបំផុតទី ៩ ប្រចាំប្រទេសឥណ្ឌូណេស៊ី Jogi Hendra Atmadja ផងដែរ ដោយបុរសម្នាក់នេះមានទ្រព្យសម្បត្តិសរុបប្រមាណ ៤,១ ពាន់លានដុល្លារ៕
ប្រភព: Says
