ថ្មីៗនេះ នាយកប្រតិបត្តិរបស់ក្រុមហ៊ុន Apple លោក Tim Cook បានបង្ហាញប្រាប់ទៅកាន់នាយករដ្ឋមន្ត្រីវៀតណាម លោក Pham Minh Chinh អំពីចំណាប់អារម្មណ៍ របស់ក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាមេរិក ក្នុងការពង្រីកខ្សែសង្វាក់ផ្គត់ផ្គង់របស់ខ្លួន នៅក្នុងប្រទេសវៀតណាម ។
ជាក់ស្តែង លោក Cook បាននិយាយ អំឡុងពេលបានជួបជាមួយនាយករដ្ឋមន្ត្រី លោក Chinh នៅក្នុងទីក្រុង San Francisco កាលពីថ្ងៃទី ១៧ ខែ ឧសភា ថាក្រុមហ៊ុន Apple នឹងពិចារណាទទួលយកការផ្គត់ផ្គង់ពីប្រទេសវៀតណាមបន្ថែមទៀត ដូចជាគ្រឿងបន្លាស់ និងសេវាកម្មរបស់ពួកគេ សម្រាប់ផលិតរបស់ Apple ។
បន្ថែមពីនេះ លោក Cook បានសម្តែងក្តីសង្ឃឹមថា រដ្ឋាភិបាលវៀតណាម នឹងអាចផ្តល់គោលនយោបាយអំណោយផលបន្ថែមទៀត ដើម្បីលើកទឹកចិត្តទៅដល់សហគ្រាសបច្ចេកវិទ្យារបស់អាមេរិក ដើម្បីមកបណ្តាក់ទុននៅក្នុងប្រទេសនេះ ។
មិនតែប៉ុណ្ណោះ លោក Chinh ក៏បានបង្ហាញពីការប្តេជ្ញាចិត្តរបស់ប្រទេសវៀតណាម ក្នុងការបង្កើតទីផ្សារប្រកបដោយតម្លាភាព និងយុត្តិធម៌ ព្រមទាំងផ្តល់ជូននូវលក្ខខណ្ឌល្អបំផុត សម្រាប់ធុរកិច្ច និងអ្នកវិនិយោគអាមេរិក ដើម្បីមកធ្វើប្រតិបត្តិការ នៅក្នុងប្រទេសវៀតណាម ។
គួរឱ្យដឹងថា Apple នៅមិនទាន់មានរោងចក្រដំឡើង នៅវៀតណាមនៅឡើយទេ ប៉ុន្តែបច្ចុប្បន្នរោងចក្រចំនួន ៣១ ដែលមានមូលដ្ឋាននៅវៀតណាម កំពុងផលិតគ្រឿងបន្លាស់ សម្រាប់ក្រុមហ៊ុនដៃគូរបស់ Apple ៕
ប្រភព: VN Express
