រយៈពេល ៦ ខែចុងក្រោយ តម្លៃហ៊ុនរបស់ក្រុមហ៊ុនរថយន្តអគ្គិសនី Tesla បានបន្តធ្លាក់ចុះឥតឈប់ឈរ ពោលបន្តធ្លាក់តាំងពីជិត ១ ១០០ ដុល្លារ មកសល់ត្រឹម ៦២៨ ដុល្លារនៅថ្ងៃទី ២៥ ឧសភា។
ការធ្លាក់ចុះមួយនេះបានធ្វើឲ្យមូលធនទីផ្សាររបស់ Tesla បាត់បង់តម្លៃស្ទើពាក់កណ្ដាល ស្របពេលទ្រព្យសម្បត្តិមេធំ Elon Musk ធ្លាក់រហូតដល់ក្រោម ២០០ ពាន់លានដុល្លារ។
ថ្វីបើស្ថានភាពសេដ្ឋកិច្ចរបស់ក្រុមហ៊ុនផលិតរថយន្តអគ្គិសនីមួយនេះកំពុងធ្លាក់ចុះក៏ពិតមែន ប៉ុន្តែវាមិនបានបង្អាក់ការពង្រីកអាជីវកម្មរបស់ពួកគេនោះឡើយ ពោលនៅថ្ងៃទី ២៥ ឧសភា Tesla បានចុះបញ្ជីបើកអាជីវកម្មនៅប្រទេសថៃ ក្រោមស្លាកយីហោ Tesla Company (Thailand) Ltd ជាមួយដើមទុនដំបូង ៣ លានបាត។
គោលដៅចំបងរបស់ Tesla ក្នុងការបើកអាជីវកម្មនៅប្រទេសថៃ គឺលក់រថយន្តអគ្គិសនី ដំឡើង និងលក់ប្រព័ន្ធស្តុកថាមពល និងប្រព័ន្ធផលិតថាមពល ជាជាងការតំឡើងរថយន្តដោយផ្ទាល់នៅទីនោះ។
ការបើកហាងលក់រថយន្ត Tesla នៅប្រទេសថៃ គឺចំពេលរដ្ឋាភិបាលបានប្រកាសពីគម្រោងកាត់បន្ថយការបំភាយឧស្ម័នកាបូនឌីអុកស៊ីត ខណៈកាលពីខែមីនាកន្លងទៅ រដ្ឋាភិបាលថៃបានអនុម័តបញ្ចេញថវិកា ៣ ពាន់លានបាតក្នុងការគាំទ្រឲ្យប្រជាជនប្រើប្រាស់រថយន្តអគ្គិសនី។
បញ្ជាក់ដែរថា Tesla ហាក់កំពុងសម្លឹងឃើញទីផ្សារនៅប៉ែកអាស៊ីអាគ្នេយ៍ខ្លាំងមួយរយៈកាលចុងក្រោយ ពោលក្រោយបើកអាជីវកម្មនៅប្រទេសកម្ពុជាមិនបានប៉ុន្មានផង ស្រាប់តែបើកសាខាថ្មីមួយនៅប្រទេសជិតខាងយើងទៀត ហើយបើតាមដំណឹងចុងក្រោយបានឲ្យដឹងថា Tesla ហាក់ចង់សាងសង់រោងចក្រផលិតអាគុយនៅប្រទេសឥណ្ឌូណេស៊ីថែមទៀត៕
ប្រភព: Thethaiger
