ថ្មីៗនេះ រដ្ឋាភិបាលឥណ្ឌូនេស៊ី បានចុះហត្ថលេខាលើកិច្ចព្រមព្រៀងសហប្រតិបត្តិការ ជាមួយធនាគារអភិវឌ្ឍន៍ឥស្លាម (IsDB) សម្រាប់ជំនួយហិរញ្ញប្បទាន ក្នុងការសាងសង់ហេដ្ឋារចនាសម្ព័ន្ធផ្លូវថ្នល់ នៅលើកោះជ្វា សម្រាប់ដំណាក់កាលទី ២ (TRSS-2) ។ នេះបើតាមការចុះផ្សាយពីសារព័ត៌មាន Antaranews ។
អគ្គនាយកហិរញ្ញវត្ថុ និងគ្រប់គ្រងហានិភ័យ នៅក្រសួងហិរញ្ញវត្ថុឥណ្ឌូនេស៊ី លោក Luky Alfirman ជាអ្នកដែលបានចុះហត្ថលេខាលើកិច្ចព្រមព្រៀងមួយនេះ បាននិយាយថា ធនាគារ IsDB នឹងផ្តល់ប្រាក់ជំនួយប្រមាណ ១៥០ លានដុល្លារ ដើម្បីសាងសង់ផ្លូវហាយវ៉េ ពីភាគកណ្តាលខេត្ត Yogyakarta ទៅកាន់ភាគខាងកើតទីក្រុង Malang ដែលនឹងត្រូវចំណាយអស់ថវិកាសរុបប្រមាណ ៤៥០ លានដុល្លារ ។
មិនតែប៉ុណ្ណោះ លោក Alfirman បាននិយាយទៀតថា ៖ ” គោលបំណងនៃការអភិវឌ្ឍន៍ហេដ្ឋារចនាសម្ព័ន្ធផ្លូវ TRSS-2 នេះ គឺ ដើម្បីជំរុញដល់កំណើនសេដ្ឋកិច្ចប្រកបដោយនិរន្តរភាព និងកាត់បន្ថយភាពក្រីក្រនៅទូទាំងកោះជ្វាខាងត្បូង ” ។
គួរឱ្យដឹងថា ផ្នែកមួយនៃគម្រោងផ្លូវបង់ថ្លៃ TRSS-2 នេះ នឹងត្រូវសាងសង់នៅភាគខាងកើតកោះជ្វា និង DI Yongyakarta ជាមួយប្រវែងដែលប៉ាន់ស្មាន ៦៧,៧៨ គីឡូម៉ែត្រ រួមទាំងស្ពានប្រវែង ៤៤៣,១ ម៉ែត្រ ដែលនឹងត្រូវឆ្លងកាត់ស្រុក Tulungagung , Blitar , Malaang និង Bantul ។
បន្ថែមពីនេះ លោក Alfirman បានជូនដំណឹងទៀតថា ការផ្តល់ហិរញ្ញប្បទានហេដ្ឋារចនាសម្ព័ន្ធផ្លូវនេះ ក៏ទទួលបានពីធនាគារអភិវឌ្ឍន៍អាស៊ី (ADB) តាមរយ:កម្មវិធីផ្តល់មូលនិធិដាច់ដោយឡែកមួយផ្សេងទៀតផងដែរ ៕
