ការធ្វើអាជីវកម្មពីបាតដៃទទេ វាមិនមែនជារឿងងាយស្រួលឡើយ ហើយមានកត្តាជាច្រើនដែលអាចជួយឲ្យជំនួញមួយអាចជោគជ័យទៅបាន ដូចជាការចេះឆក់យកឱកាស សំណាង និងទេពកោសល្យ។
តួយ៉ាង បុគ្គល ៥ រូបដែលឧកញ៉ាញ៉ូវស៍ នឹងលើកយកមករៀបរាប់ត្រួសៗបន្តិចទៀតនេះ គឺបានចាប់ផ្ដើមធ្វើជំនួញពីបាតដៃទទេសុទ្ធសាធ តែបច្ចុប្បន្នពួកគេកំពុងតែអង្គុយសោយសុខលើគំនរមាសប្រាក់យ៉ាងហូរហៀរ។
១/ Jack Ma
មហាសេដ្ឋីជនជាតិចិន បច្ចុប្បន្នមានទ្រព្យសម្បត្តិប្រមាណ ២៥,៤ ពាន់លានដុល្លារ ហើយទម្រាំឈានចូលដល់ថ្ងៃនេះ ស្ថាបនិក Alibaba ហែលកាត់ព្យុះភ្លៀងមិនតិចសារឡើយ។ Jack Ma ធ្លាប់បាននិយាយជារឿយៗថា លោកមិនដែលបោះបង់ក្ដីស្រមៃឡើយ ហើយលោកគឺជាមនុស្សមិនងាយចុះចាញ់នឹងព្រេងវាសនាដូចគ្នា។
នៅចាំបានថា ពេល KFC បើកហាងនៅប្រទេសចិន មនុស្ស ២៤ នាក់បានដាក់ពាក្យធ្វើការ មាន២៣ នាក់ទទួលបានការងារ ប៉ុន្តែ Jack Ma បែរជាមិនជាប់ ហើយលោកក៏ធ្លាប់ទទួលការបដិសេធពីសាកលវិទ្យាល័យ Harvard ដល់ទៅ ១០ ដងផងដែរ។ ប៉ុន្តែដោយសារការតស៊ូ សព្វថ្ងៃបុរសម្នាក់នេះក្លាយជាម្ចាស់ក្រុមហ៊ុនពាណិជ្ជកម្មអេឡិចត្រូនិកធំបំផុតទី ៣ លើលោក។
២/ Oprah Winfrey
នាយកប្រតិបត្តិ The Oprah Winfrey Network និង Harpo Productions មានទ្រព្យសម្បត្តិសរុបប្រមាណ ២,៥ ពាន់លានដុល្លារ ប៉ុន្តែប្រវត្តិរបស់សេដ្ឋីនីម្នាក់នេះ មិនមែនរស់ស្រួលប៉ុន្មានឡើយ។
មុននឹងមានថ្ងៃនេះ Winfrey ធ្លាប់ទទួលបានការរើសអើងពូជសាសន៍ ធ្លាប់ជួបប្រទះនឹងភាពអត់ឃ្លាន និងសូម្បីតែមានគេបៀតបៀនផ្លូវភេទថែមទៀត។ ប៉ុន្តែបច្ចុប្បន្ន អ្នកស្រីគឺជា Idol របស់មនុស្សរាប់លាននាក់ និងជាពិធីការនីដែលទទួលបានការស្រលាញ់ចូលចិត្តពីប្រជាជនទូទាំងពិភពលោក។
៣/ Jan Koum
ស្ថាបនិក WhatsApp គឺបានដឹងក្ដីឡើងនៅភូមិតូចមួយនៅជាយក្រុង Kyiv ប្រទេសអ៊ុយក្រែន ដែលបច្ចុប្បន្នកំពុងស្ថិតក្រោមការវាយលុកពីប្រទេសរុស្ស៊ី។ បុរសម្នាក់នេះបានធ្វើចំណាកស្រុកមកសហរដ្ឋអាមេរិកតាំងពីក្មេង ហើយចិញ្ចឹមជីវិតដោយការធ្វើការងារកំប៉ិកកំប៉ុកឲ្យតែបានប្រាក់ទិញបាយហូប។
ដោយសារចិត្តស្រលាញ់ និងមានដុងពីធម្មជាតិលើវិស័យបច្ចេកវិទ្យា Koum បានបង្កើត WhatsApp ឡើង និងបានលក់ឲ្យ Facebook ក្នុងតម្លៃប្រមាណ ១៩ ពាន់លានដុល្លារ ហើយបច្ចុប្បន្នលោកមានទ្រព្យសម្បត្តិសរុប ១៣,៨ពាន់លានដុល្លារ។
៤/ Ritesh Aggarwal
មិនសូវខុសគ្នាពី Koum ឡើយ ដោយបុរសជនជាតិឥណ្ឌាម្នាក់នេះធំធាត់នៅទីក្រុងតូចមួយ ហើយប្រកបអាជីពជាក្មេងលក់ស៊ីមកាត មុនពេល Ritesh បង្កើត OYO នៅក្នុងឆ្នាំ ២០១៣ ហើយបច្ចុប្បន្នលោកគឺជាមហាសេដ្ឋីវ័យក្មេងបំផុតមួយរូបប្រចាំប្រទេសឥណ្ឌា ជាមួយប្រាក់ហូរហៀរ ២ពាន់លានដុល្លារ។
៥/ Howard Schultz
អាចនិយាយបានថា បុរសម្នាក់នេះហាក់មានជីវភាពលំបាកជាងគេបន្តិច ដោយសារឪពុកម្ដាយរបស់លោកមិនអាចសូម្បីតែមានលទ្ធភាពជួលផ្ទះ ហើយពេលខ្លះអត់សូម្បីតែអាហារមួយពេលបំពេញក្រពះ។
ទម្រាំក្លាយជាម្ចាស់ហាងកាហ្វេល្បីបំផុតទូទាំងពិភពលោក Starbucks ដូចពេលនេះ Howard បានខិតខំពុះពារឧបសគ្គអស់ជាច្រើន។ យោងតាមរបាយការណ៍ពី Forbes បានអះអាងថា ទ្រព្យសម្បត្តិរបស់មេធំ Starbucks ម្នាក់នេះគឺមានប្រហែល ៤ ពាន់លានដុល្លារ៕
