បច្ចុប្បន្ន សេដ្ឋកិច្ចពិភពលោកហាក់មានការធ្លាក់ចុះ ឬមានកំណើនសេដ្ឋកិច្ចទាបជាងការរំពឹងទុក ជាខ្លាំង ដោយសារឥទ្ធិពលសង្គ្រាម ការរាតត្បាតជំងឺកូវីដ ១៩ ស្របពេលសេដ្ឋកិច្ចប្រទេសចិនក៏កំពុងមានការថមថយដូចគ្នា។
កាលណាសេដ្ឋកិច្ចពិភពលោកដើរយឺត នោះវានឹងធ្វើឲ្យសេដ្ឋកិច្ចប្រទេសដែលមានទំហំសេដ្ឋកិច្ចមធ្យម ឬទាបជាង ជួបបញ្ហាជាច្រើន ហើយបញ្ហាចំបងបង្អស់គឺវិបត្តិអតិផរណា។ នេះបើតាមរបាយការណ៍ចុងក្រោយបំផុតរបស់ធនាគារពិភពលោក។
កំណើនសេដ្ឋកិច្ចពិភពលោកត្រូវបានរំពឹងថា នឹងមានការធ្លាក់ចុះពី ៥,៧% ពីឆ្នាំ ២០២១ មកនៅ ២,៩% នៅឆ្នាំ ២០២២ ហើយវានឹងបន្តស្ថិតនៅល្បាក់ៗនេះក្នុងអំឡុងឆ្នាំ ២០២៣ ឬ ២០២៤ ដោយសារឥទ្ធិពលសង្គ្រាមនៅអ៊ុយក្រែន រំខានដល់សកម្មភាពវិនិយោគ ការជួញដូរពាណិជ្ជកម្ម តម្រូវការមានការធ្លាក់ចុះ និងគោលនយោបាយសារពើពន្ធ និងរូបិយវត្ថុត្រូវបានដកចេញ។
ជាលទ្ធផល នៅឆ្នាំនេះកម្រិតចំណូលរបស់ប្រជាជននៅប្រទេសកំពុងអភិវឌ្ឍន៍នឹងមានការថយចុះប្រហែល ៥% ទាបជាងនិន្នាការមុនពេលមានជំងឺរាតត្បាត និងសង្គ្រាម។
“សង្គ្រាមនៅអ៊ុយក្រែន ការបិទខ្ទប់នៅចិន សង្វាក់ផ្គត់ផ្គង់មានការរំខាន ស្របពេលហានិភ័យនៃភាពជាប់គាំងក៏កំពុងមានការកើនឡើងទៀត។ ប្រទេសជាច្រើន ពិបាកនឹងជៀសផុតពីវិបត្តិសេដ្ឋកិច្ចខ្លាំងណាស់”។ នេះបើតាមសម្ដីរបស់លោក David Malpass ប្រធានធនាគារពិភពលោក។
ដោយឡែក Global Economic Prospects ក៏បានរាយការណ៍ទៀតថា កំណើនសេដ្ឋកិច្ចជឿនលឿនត្រូវបានព្យាករណ៍ថា នឹងធ្លាក់ចុះពី ៥,១% នៅឆ្នាំ ២០២១ មកនៅ ២,៦% នៅឆ្នាំ ២០២២ ទាបជាង ១,២% នៃការសន្និដ្ឋានកាលពីខែមករា។
សូមជម្រាបដែរថា ក្នុងចំណោមទីផ្សារដែលកំពុងមានការរីកចម្រើន និងសេដ្ឋកិច្ចកំពុងអភិវឌ្ឍន៍ក៏ត្រូវបានគេព្យាករណ៍ដែរថា នឹងមានការធ្លាក់ចុះពី ៦,៦% នៅឆ្នាំ ២០២១ មកនៅត្រឹម ៣,៤% នៅឆ្នាំ ២០២២ ដែលនេះគឺទាបជាងកំណើនសេដ្ឋកិច្ចចន្លោះពីឆ្នាំ ២០១១ ដល់ ២០១៩ ថែមទៀត ដែលអំឡុងឆ្នាំនោះមធ្យមភាគកំណើនសេដ្ឋកិច្ចមាន ៤,៨%៕
