ដូចដែលប្រិយមិត្តធ្លាប់បានដឹងហើយថា ប្រទេសថៃបានបន្ធូរបន្ថយលើការពង្រឹងវិធានការទប់ស្កាត់ជំងឺកូវីដ ១៩ ដូចជា លែងតម្រូវឲ្យមានការធ្វើចត្តាឡឺស័ករយៈពេលយូរជាដើម ក្នុងការធ្វើដំណើរកម្សាន្តនៅប្រទេសអាស៊ីអាគ្នេយ៍មួយនេះ។
ទន្ទឹមនឹងនោះ រដ្ឋាភិបាលថៃបានទម្លាយថា ពួកគេមានគម្រោងទាញយកប្រាក់ចំណូលយ៉ាងច្រើនពីវិស័យទេសចរណ៍ អំឡុងពេលបន្ធូរបន្ថយវិធានការទប់ស្កាត់កូវីដ ១៩ នេះ ប្រមាណ ៤០០ ពាន់លានបាត ឬប្រហែល ១១ ពាន់លានដុល្លារនៅឆមាសទី ២ ឆ្នាំ ២០២២ នេះ។
ជាការពិត រយៈពេល ៨ ខែតំបូងនៃឆ្នាំ ២០២២ ចំនួនភ្ញៀវទេសចរណ៍ដែលបានមកកំសាន្តនៅប្រទេសថៃមានរហូតដល់ ៤ លាននាក់ ខណៈរដ្ឋាភិបាលមានបំណងចង់អូសទាញភ្ញៀវទេសចរណ៍ឡើងវិញក្នុងចំនួនប្រមាណ ១០ លាននាក់មុនដាច់ឆ្នាំ ២០២២។
ក្នុងចំណោមភ្ញៀវទេសចរណ៍ទាំងអស់ ភាគច្រើនមកពីបណ្ដាប្រទេសដូចជា ម៉ាឡេស៊ី ឥណ្ឌា និងសិង្ហបុរី ហើយប្រាក់ចំណូលសរុបរយៈពេល ៨ ខែពីវិស័យទេសចរណ៍ គឺទទួលបានប្រមាណជិត ៥ ពាន់លានដុល្លារ។ នេះបើតាមការចុះផ្សាយពី CNA៕
