សង្គ្រាមរវាងរុស្ស៊ី និងអ៊ុយក្រែនបានចាប់ផ្ដើមឡើងតាំងពីចុងខែកុម្ភៈឆ្នាំ២០២២ មកទល់ពេលនេះ ហើយស្ថានការណ៍បច្ចុប្បន្ន គឺរឹតតែគួរឲ្យព្រួយបារម្ភជាខ្លាំង។
សង្គ្រាមមួយនេះក៏បានធ្វើឲ្យប្រទេសទាំង ២ ខាតបង់ផលប្រយោជន៍ជាច្រើនផងដែរ ជាពិសេសគឺប៉ះពាល់ខ្លាំងទៅលើសេដ្ឋកិច្ចពិភពលោក ដ្បិតរុស្ស៊ី និងអ៊ុយក្រែនគឺជាប្រភពនាំចេញផលិតផលកសិកម្មដ៏ធំមួយទូទាំងសកលលោក។
យោងតាមការចុះផ្សាយពី Fortune បានឲ្យដឹងថា សង្គ្រាមដែលរុស្ស៊ីបានចាប់ផ្ដើមនេះ អាចនឹងធ្វើឲ្យទំហំសេដ្ឋកិច្ចពិភពលោកនៅឆ្នាំ ២០២៣ ថយចុះ ២,៨ ទ្រីលានដុល្លារ ឬច្រើនជាងនេះ បើសិនជាស្ថានការណ៍នៅតែបន្តធ្លាក់ចុះក្នុងសភាពដុនដាប។ នេះបើតាមការបញ្ជាក់ពីអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ ហៅកាត់ OECD។
មុនពេលផ្ទុះសង្គ្រាម OECD បានព្យាករថា ទំហំសេដ្ឋកិច្ចពិភពលោកនៅឆ្នាំ ២០២២ នឹងកើនដល់ ៤,៥% និង ៣,២% នៅឆ្នាំ ២០២៣ ប៉ុន្តែបន្ទាប់ពីសង្គ្រាមបានផ្ទុះឡើង OECD ទម្លាយវិញថា សេដ្ឋកិច្ចឆ្នាំនេះអាចកើនត្រឹម ៣% និងឆ្នាំក្រោយត្រឹម ២,២% ប៉ុណ្ណោះ។
នេះក៏មានន័យថា ទំហំសេដ្ឋកិច្ចសម្រាប់ឆ្នាំនេះ និងឆ្នាំក្រោយ នឹងមានកំណើនយឺតជាងការរំពឹងទុក ហើយមូលហេតុចំបងនោះគឺ សង្គ្រាមដែលកំពុងកើតមានឡើងរវាងរុស្ស៊ី និងអ៊ុយក្រែនតែម្ដង៕
