មហាសេដ្ឋីវៀតណាម​ របូតលុយរយលានដុល្លារស្ទើរគ្រប់គ្នា ក្រោយតម្លៃហ៊ុនធ្លាក់ចុះ

មហាសេដ្ឋីវៀតណាមជាច្រើន ត្រូវបានគេមើលឃើញថា ទ្រព្យសម្បត្តិសរុបរបស់ពួកគេ កំពុងបាត់បង់រាប់រយលានដុល្លារ កាលពីខែមុនកន្លងទៅ បន្ទាប់ពីទីផ្សារភាគហ៊ុនធ្លាក់ចុះយ៉ាងគំហុក ។ នេះបើយោងតាមការចុះផ្សាយដោយទស្សនាវដ្ដី Forbes ។

ដោយគិតត្រឹមថ្ងៃទី ១៦ ខែតុលា បុសមានជាងគេបំផុត របស់ប្រទេសវៀតណាម លោក Pham Nhat Voung ប្រធានក្រុម Vingroup ដែលជាក្រុមហ៊ុនឯកជនធំជាងគេបំផុតនៅក្នុងប្រទេស ត្រូវបាន Forbes បង្ហាញថាទ្រព្យសម្បត្តិសរុបរបស់លោក មកនៅសល់ត្រឹម ៤,៤ ពាន់លានដុល្លារ ក្រោយធ្លាក់ចុះប្រមាណ ៣០០ លានដុល្លារ ។

យ៉ាងណា ខាងក្រោមនេះ គឺជាបញ្ជីឈ្មោះមហាសេដ្ឋីវៀតណាម ផ្សេងទៀត ដែលត្រូវបានគេរាយការណ៍ថាបានបាត់បង់ទ្រព្យសម្បត្តិច្រើនសន្ធឹកសន្ធាប់ បន្ទាប់ពីការធ្លាក់ចុះភាគហ៊ុនកាលពីខែមុន ៖

• លោក Bui Thanh Nhon ប្រធានក្រុមហ៊ុនអចលនទ្រព្យ Novaland មានទ្រព្យសម្បត្តិសរុប ២,៧ ពាន់លានដុល្លារ ធ្លាក់ចុះ ៦០០ លានដុល្លារ
• លោកស្រី Nguyen Phuong Thao ម្ចាស់ក្រុមហ៊ុន Vietjet និង HCMC Devlopment មានទ្រព្យសម្បត្តិសរុប ២,៣ ពាន់លានដុល្លារ ធ្លាក់ចុះ ២០០ លានដុល្លារ
• លោក Tran Dinh Long ប្រធានក្រុមហ៊ុនដែកថែប Hoa Phat Group មានទ្រព្យសម្បត្តិសរុប ១,៦ ពាន់លានដុល្លារ ធ្លាក់ចុះ ៤០០ លានដុល្លារ
• លោក Tran Ba Duong ប្រធានក្រុមហ៊ុន Truong Hai Auto Corporation មានទ្រព្យសម្បត្តិសរុប ១,៥ ពាន់លានដុល្លារ ធ្លាក់ចុះ ១០០ លានដុល្លារ
• លោក Ho Hung Anh ប្រធានក្រុមហ៊ុនផ្តល់ប្រាក់កម្ចី Techcombank មានទ្រព្យសម្បត្តិសរុប ១,៥ ពាន់លានដុល្លារ ធ្លាក់ចុះ ៦០០ លានដុល្លារ
• លោក Nguyenn Dang Quang ប្រធានក្រុមហ៊ុន Masan Group មានទ្រព្យសម្បត្តិសរុប ១,២ ពាន់លានដុល្លារ ធ្លាក់ចុះ ៥០០ លានដុល្លារ

ជម្រាបជូនឱ្យដឹងផងដែរថា មិនត្រឹមតែមហាសេដ្ឋីវៀតណាមប៉ុណ្ណោះទេ ដែលបានបាត់បង់ទ្រព្យសម្បត្តិរបស់ខ្លួន ខណ:ស្ថាបនិកក្រុមហ៊ុន Tesla និងជាមហាសេដ្ឋីមានបំផុតលើពិភពលោក Elon Musk វិញ ក៏បានបាត់បង់ទ្រព្យសម្បត្តិរបស់ខ្លួនចំនួន ៦៥,៥ ពាន់លានដុល្លារផងដែរ ដោយបច្ចុប្បន្នទ្រព្យសម្បត្តិសរុបរបស់លោក ធ្លាក់មកនៅ ២០៧,៧ ពាន់លានដុល្លារ ៕