កាលពីឆ្នាំ ២០២១ ទំហំសេដ្ឋកិច្ចនៃសហរដ្ឋអាមេរិកបានកើនឡើង ៥,៧% ជាការកើនឡើងលឿនបំផុតតាំងពីឆ្នាំ ១៩៨៤ បន្ទាប់ពីមហាអំណាចមួយនេះទទួលរងឥទ្ធិពលអាក្រក់ ដោយសារជំងឺរាតត្បាត។
កំណើនសេដ្ឋកិច្ចឆ្នាំទៅ ជួយអាមេរិកបង្កើតកំណត់ត្រាថ្មីមួយ គឺការនាំចេញទំនិញកើនឡើងដល់ចំណុចខ្ពស់បំផុតមិនធ្លាប់មាន ១,៨ ទ្រីលានដុល្លារ ប៉ុន្តែឱនភាពពាណិជ្ជកម្មវិញបានកើនពី ៩២២ ពាន់លានដុល្លារកាលពីឆ្នាំ ២០២០ ឡើងដល់ ១,១ ទ្រីលានដុល្លារនៅឆ្នាំ ២០២១។
ដោយឡែក ប្រទេសដែលអាមេរិកចាត់ទុកជាដៃគូពាណិជ្ជកម្មធំបំផុតវិញមានដូចជា កាណាដា ម៉ិកស៊ិក និងចិន ដែលក្ដោបក្ដាប់ការធ្វើពាណិជ្ជកម្មសរុបប្រចាំឆ្នាំរបស់អាមេរិកប្រមាណ ៤១% ប៉ុន្តែក្នុងចំណោមនោះ ចិនទទួលផលចំណេញច្រើនជាងគេ។
យោងតាមការចុះផ្សាយពី Visualcapitalist បានបង្ហាញថា អាមេរិកនាំចូលទំនិញពីកាណាដា ៣៥៧,២ ពាន់លានដុល្លារ និងនាំចេញទៅវិញ ៣០៧,៦ ពាន់លានដុល្លារ ដូច្នេះកាណាដាចំណេញបានជិត ៥០ ពាន់លានដុល្លារ។
រីឯម៉ិកស៊ិកវិញ នាំចូលទំនិញមកសហរដ្ឋអាមេរិកប្រមាណ ៣៨៤,៧ ពាន់លានដុល្លារ និងនាំទំនិញចូលប្រទេសវិញតែ ២៧៦,៥ ពាន់លានដុល្លារ ចំណេញជាង ១០៨ ពាន់លានដុល្លារ ខណៈចិនកើបលុយច្រើនជាងគេ ពោលនាំចូលទំនិញមកសហរដ្ឋអាមេរិកប្រមាណ ៥០៦ ពាន់លានដុល្លារ តែនាំចេញពីអាមេរិកទៅវិញតែ ១៥១ ពាន់លានដុល្លារប៉ុណ្ណោះ ដែលនេះមានន័យថា ចិនកើបលុយបានជាង ៣៥៥ ពាន់លានដុល្លារ ពីការធ្វើពាណិជ្ជកម្មជាមួយអាមេរិកកាលពីឆ្នាំ ២០២១៕
