កាលពីថ្ងៃទី ០៦ ធ្នូកន្លងទៅ ក្រុមហ៊ុនតៃវ៉ាន់ TSMC មានបំណងចង់សាងសង់រោងចក្រផលិតបន្ទះឈីបទី ២ នៅតំបន់ Arizona ជាមួយនឹងកញ្ចប់ថវិកាវិនិយោគប្រមាណ ៤០ ពាន់លានដុល្លារ។
យោងតាមការចុះផ្សាយពី CNA បានឲ្យដឹងថា ក្រុមហ៊ុនខ្នាតយក្សមួយនេះរំពឹងថា អាចទទួលបានចំណូលរហូតដល់ ១០ ពាន់លានដុល្លារ ពេលរោងចក្រទាំង ២ នៅអាមេរិកចាប់ផ្ដើមដំណើរការ។
ប្រភពដដែលអះអាងថា រោងចក្រទី ១ របស់ TSMC នៅអាមេរិកអាចនឹងចាប់ផ្ដើមសង្វាក់ផលិតកម្មតំបូងក្នុងឆ្នាំ ២០២៤ ខណៈរោងចក្រទី ២ ដែលផ្ដោតលើការផលិតបន្ទះឈីបទំនើបបំផុត នឹងបើកដំណើរការនាឆ្នាំ ២០២៦។
សូមជម្រាបដែរថា ប្រធានក្រុមហ៊ុន Mark Liu ក៏បានបង្ហើបដែរថា គម្រោងការណ៍សាងសង់រោងចក្រធំៗទាំង ២ នៅអាមេរិកនេះ នឹងផ្ដល់ឱកាសការងារដែលមានប្រាក់ខែខ្ពស់រហូតដល់ ១៣ ០០០ កន្លែង បុគ្គលិកទូទៅ ៤ ៥០០ កន្លែង ក៏ដូចជាចែករំលែកបទពិសោធន៍នានាទៀតផង៕
