ថ្មីៗនេះ រដ្ឋមន្ត្រីហិរញ្ញវត្ថុនៃប្រទេសប៉ាគីស្ថាន Ishaq Dar បានបង្ហើបថា រដ្ឋាភិបាលកំពុងស្នើសុំជំនួយបន្ទាន់ពីប្រទេសអារ៉ាប៊ីសាអូឌីត ប្រមាណ ៤,២ ពាន់លានដុល្លារ បន្ទាប់ពីទុនបម្រុងបរទេសធ្លាក់ចុះខ្លាំង។ នេះបើតាមការចុះផ្សាយពី Reuters។
ដោយឡែក ប្រភពជិតស្និទ្ធមួយទៀតបានទម្លាយថា រដ្ឋាភិបាលប៉ាគីស្ថាន នឹងទិញប្រេង និងជីដែលមានតម្លៃ ១,២ ពាន់លានដុល្លារពីអារ៉ាប៊ីសាអូឌីតពីក្នុងកញ្ចប់ជំនួយនោះ ខណៈលិខិតស្នើសុំត្រូវបានប្រគល់ជូនព្រះអង្គម្ចាស់ Muhammad bin Salman រួចស្រេចហើយ។
សូមជម្រាបថា ទុនបម្រុងបរទេសរបស់ប៉ាគីស្ថានគឺបានធ្លាក់ចុះរហូតដល់ ៦,៧ ពាន់លានដុល្លារជាលើកដំបូងតាំងពីខែមករា ២០១៩ ដែលមិនគ្រប់គ្រាន់ដើម្បីទូទាត់ប្រាក់ដើម និងការប្រាក់ចំនួន ៨,៨ ពាន់លានដុល្លារ ក្នុងអំឡុងឆ្នាំសារពើពន្ធបច្ចុប្បន្ន។
គួររំលឹកបន្ថែមថា កន្លងមកអារ៉ាប៊ីសាអូឌីត បានចាក់លុយ ៣ ពាន់លានដុល្លារទៅកាន់ធនាគារកណ្ដាលប៉ាគីស្ថាន ហើយខាងធនាគារក៏បានបង្ហើបថា នេះជាសញ្ញានៃការគាំទ្រចំណងមិត្តភាពរបស់អារ៉ាប៊ីសាអូឌីត ចំពោះរដ្ឋាភិបាលប៉ាគីស្ថាន៕
