យ៉ាងហោចណាស់ពលរដ្ឋវៀតណាមជាង ៤ ពាន់នាក់ ត្រូវបានគេរាយាការណ៍ បានបាត់បង់លុយ និងបានធ្លាក់ខ្លួនជាប់ក្នុងវិបត្តិបំណុល បន្ទាប់ពីបានធ្វើការវិនិយោគទៅក្នុងគម្រោង របស់ក្រុមហ៊ុនអភិវឌ្ឍអចលនទ្រព្យ Alibaba ដែលមានមូលដ្ឋាននៅទីក្រុងហូជីមិញ ក្រោយរកឃើញថាគម្រោងនេះ គឺមានតែនៅលើក្រដាសតែប៉ុណ្ណោះ ។
តាមការចុះផ្សាយពីសារព័ត៌មាន Vietnam Express បានឱ្យដឹងថា លោក Ngo Hung Duyet ដែលជាជនរងគ្រោះម្នាក់ បានសម្រេចចិត្តធ្វើដំណើរពីទីក្រុង Da Nang ទៅកាន់ទីក្រុងហូជីមិញ ដើម្បីចូលរួម នៅក្នុងសវនាការ ពាក់ព័ន្ធជាមួយនឹងការបោកប្រាស់ លក់គម្រោងដីឡូតិ៍ចំនួន ៥៨ កន្លែងរបស់ក្រុមហ៊ុន Alibaba ។
រំលឹកថា កាលពីឆ្នាំ ២០១៨ លោក Duyet បានចំណាយលុយចំនួន ៥៧៨ លានដុង (២៤ ៤៣៤ ដុល្លារ) ដើម្បីទិញដីឡូតិ័ចំនួន ២ ប្លង់ និងបានដាក់ប្រាក់កក់មួយភាគបីនៃគម្រោងរបស់ក្រុមហ៊ុន Alibaba នោះ ។
លើសពីនេះ លោក Duyet បានបង្ហាញថា ដំបូងឡើយលោកបានឃើញការផ្សព្វផ្សាយពាណិជ្ជកម្មជាច្រើន អំពីគម្រោងដីឡូតិ៍របស់ Alibaba ហើយលោក ក៏បានទាក់ទងទៅក្រុមហ៊ុន ដោយអ្នកលក់ បានបង្ហាញនូវដីឡូត៍មួយចំនួន នៅស្រុក Ba Ria ខេត្តVung Tau ហើយពួកគេបានបញ្ចុះបញ្ចូលគាត់ឱ្យចុះកិច្ចសន្យាទិញយក ជាមួយនឹងការធានាថានឹងផ្តល់ប័ណ្ណកម្មសិទ្ធិ ក្នុងរយៈពេលមួយឆ្នាំ បន្ទាប់ពីការទិញនោះ។
លុះដល់ថ្ងៃកំណត់ លោក Duyet បានទូរស័ព្ទទៅក្រុមហ៊ុន ដើម្បីសាកសួរអំពីប័ណ្ណកម្មសិទ្ធ ប៉ុន្តែត្រូវបានអ្នកតំណាងក្រុមហ៊ុន Alibaba បញ្ចុះបញ្ចូលគាត់ឱ្យដាក់ប្រាក់ចំនួន ២០ លានដុងទៀត ដើម្បីទិញដីឡូតិ៍របស់ពួកគេមួយប្លង់បន្ថែមទៀត ។
ប៉ុន្តែ នៅត្រឹមតែប៉ុន្មានថ្ងៃក្រោយមក ប្រធានក្រុមហ៊ុនអចលនទ្រព្យ Alibaba លោក Nguyen Thai Luyen ស្រាប់តែត្រូវបានចាប់ខ្លួន ពីបទឆបោកតែម្តង។
ក្រោយពីដឹងថានេះជាការឆបោកមក លោក Duyet បាននិយាយថា ចាប់តាំងពីវិនិយោគលើគម្រោងទាំងនេះមក គ្រួសាររបស់គាត់ បានធ្លាក់ចូលទៅក្នុងវិបត្តិផ្លូវចិត្ត និងហិរញ្ញវត្ថុ ដោយគាត់នឹងប្រពន្ធរបស់គាត់ ត្រូវប្រើចំណូលទាំងអស់ ដើម្បីបង់ការប្រាក់កម្ចីធនាគារ ហើយក៏ត្រូវខ្ចីពីមិត្តភក្តិ និងសាច់ញាតិបន្ថែមទៀតផងដែរ ។
គួរឱ្យដឹងថាលោក Duyet ស្ថិតនៅក្នុងចំណោមជនរងគ្រោះ ៣០០ នាក់ ដែលបានបង្ហាញខ្លួន នៅក្នុងសវនាការ កាលពីថ្ងៃចន្ទ ដោយលោកបានស្នើសុំឱ្យតុលាការប្រជាជនទីក្រុងហូជីមិញ ជួយស្វែងរកសំណងទឹកប្រាក់ចំនួន ៧៥៨ លានដុង នៅពេលដែលពលរដ្ឋវៀតណាមជាង ៤ ពាន់នាក់ទៀត ក៏បានធ្លាក់ជាជនរងគ្រោះរបស់ Alibaba ផងដែរ ៕
